തിരുവനന്തപുരം: ഓൺലൈൻ മദ്യവിതരണത്തിനായി അവതരിപ്പിച്ച ബിവ്ക്യു ആപ്പ് സർക്കാരിന് തീരാ തലവേദനയാകുന്നു. ആപ്പ് സമ്പൂർണ്ണ പരാജയമായതോടെ ഫെയർകോഡ് ടെക്നോളജീസ് ഉടമകൾ ഓഫിസിൽനിന്ന് സ്ഥലം വിട്ടെന്ന് റിപ്പോർട്ട്.
കമ്പനിയുടെ കൊച്ചി ഇളങ്കുളം ചെലവന്നുർ റോഡിലെ ഓഫീസിൽ ഉടമസ്ഥർ ഇല്ല. ജീവനക്കാർ മാത്രമാണുള്ളത്. ഡയറക്ടർ ബോർഡ് അംഗങ്ങൾ ഉൾപ്പടെ ആരും ഫോണെടുക്കാനോ പ്രതികരിക്കാനോ തയാറാകുന്നില്ലെന്നാണ് വിവരം. കമ്പനിയുടെ ഫേസ്ബുക്ക് പേജും നിർജ്ജീവമാണ്.
നേരത്തെ നിശ്ചിത സമയം കഴിഞ്ഞിട്ടും ആപ് ലഭിക്കാത്തതിനെത്തുടർന്ന് സമൂഹ മാധ്യമങ്ങളിൽ രൂക്ഷമായ വിമർശനം ഉയർന്നിരുന്നു. ആപ്പ് പരാജയമായതോടെ മദ്യം ആവശ്യപ്പെട്ട് ബാറുകളിലും ബിവറേജസ് ഔട്‍ലറ്റുകളിലും എത്തുന്നവരുടെ എണ്ണം വർധിച്ചിട്ടുണ്ട്. ഇതിനിടെ പലയിടത്തും ടോക്കണില്ലാതെ മദ്യം വിതരണം ചെയ്യുകയും സാമൂഹിക അകലം പാലിക്കാതിരിക്കുകയും ചെയ്തത് വിവാദമായിട്ടുണ്ട്.
ഇതോടെ ആപ്പ് സർക്കാർ പിൻവലിക്കുമെന്ന് സൂചനകളുണ്ടായിരുന്നു. എന്നാൽ സാങ്കേതിക തകരാറുകൾ പരിഹരിച്ച് ആപ്പ് തത്കാലം തുടരാനാണ് സർക്കാർ തീരുമാനം.
