മലപ്പുറം: മന്ത്രി കെ ടി ജലീൽ വീണ്ടും ആരോപണക്കുരുക്കിൽ. തിരൂര്‍ മലയാളം സര്‍വകലാശാലയ്ക്ക് ഭൂമി വാങ്ങിയതില്‍ വന്‍ അഴിമതിയുണ്ടെന്നാണ് ആരോപണം. നിര്‍മാണ യോഗ്യമല്ലാത്ത ഭൂമി വന്‍ തുകയ്ക്ക് ഏറ്റെടുത്തുവെന്ന ആരോപണമാണ് ജലീലിനെതിരെ ഉന്നയിക്കപ്പെടുന്നത്.
ഇടത് സർക്കാർ മലയാളം സർവ്വകലാശാലക്ക് വേണ്ടി ഏറ്റെടുത്ത ഭൂമിയുടെ ക്രയവിക്രയവുമായി ബന്ധപ്പെട്ട അഴിമതിയെ സംബന്ധിച്ചുള്ള വിവരങ്ങളാണ് ദേശീയ ഹരിത ട്രൈബ്യൂണലിന്റെ വിദഗ്ധ സമിതി റിപ്പോർട്ടിൽ ഉള്ളതെന്ന് യൂത്ത് ലീഗ് ആരോപിക്കുന്നു.
പ്രസ്തുത ഭൂമി സി ആർ സെഡ് സോൺ മൂന്നില്‍ പെടുന്നതാണെന്ന് ഹരിത ട്രിബ്യൂണലിന്റെ വിദഗ്ദ്ധ സമിതി കണ്ടെത്തിയിരുന്നു. തുടര്‍ന്ന് ഭൂമി ഒരുതരത്തിലുമുള്ള നിര്‍മാണങ്ങള്‍ക്കും പറ്റിയതല്ലെന്ന് വ്യക്തമാക്കി ഹരിത ട്രിബ്യൂണല്‍ വിധി പുറപ്പെടുവിച്ചു. ഇത്തരം ഭൂമി വന്‍ വിലകൊടുത്ത് ഏറ്റെടുത്തത് എന്തിനാണെന്ന് സര്‍ക്കാര്‍ വ്യക്തമാക്കണമെന്ന് യൂത്ത് ലീഗ് സംസ്ഥാന സെക്രട്ടറി പി കെ ഫിറോസ് ചോദിക്കുന്നു. താനൂര്‍ എം.എല്‍.എ വി അബ്ദുറഹ്‌മാന്റെയും താനൂരിലെ ഇടതുപക്ഷ സ്ഥാനാര്‍ത്ഥിയായിരുന്ന ലില്ലീസ് ഗഫൂറിന്റെയും ബന്ധുക്കളുടെ ഭൂമി ഇതിലുണ്ടെന്നും പികെ ഫിറോസ് കൂട്ടിച്ചേർത്തു.
ഭൂമിക്ക് പണം അനുവദിച്ചത് കെ ടി ജലീൽ ഇടപെട്ടാണ്. 16 കോടി 63 ലക്ഷം രൂപ വില നിശ്ചയിച്ച് ഏറ്റെടുത്ത ഭൂമിക്ക് ഒന്‍പത് കോടി ഇതിനകം അനുവദിച്ചുകഴിഞ്ഞു. ട്രിബ്യൂണലിന്റെ വിധി മറച്ചുവെച്ച് ബാക്കി തുക കൂടി ആവശ്യപ്പെട്ടിരിക്കുകയാണ് ഉന്നത വിദ്യാഭ്യാസ വകുപ്പെന്നും ആരോപിക്കപ്പെടുന്നു.
ഹരിത ട്രിബ്യൂണലിന്റെ വിധിയുടെ പശ്ചാത്തലത്തില്‍ ഭൂമി അടിയന്തിരമായി തിരിച്ചുപിടിക്കണമെന്നും അന്വേഷണം വേണമെന്നും പി,കെ ഫിറോസ് ആവശ്യപ്പെട്ടു. ഇതില്‍ നിന്നും കെ.ടി ജലീലും സിപിഎമ്മും എത്ര രൂപ കൈക്കലാക്കിയെന്നും ഫിറോസ് ചോദിക്കുന്നു.
Discussion about this post