മലയാളത്തിലെ കുടുംബ ചിത്രങ്ങൾക്കും ത്രില്ലർ ചിത്രങ്ങൾക്കും പുതിയ മാനം നൽകി ഇൻഡസ്ട്രി ഹിറ്റ് പദവിയിലേക്കുയർന്ന മോഹൻലാൽ ചിത്രം ദൃശ്യത്തിന്റെ രണ്ടാം ഭാഗം ഷൂട്ടിംഗ് പുരോഗമിക്കുന്നു. ചിത്രത്തിന്റെ പ്രൊമോഷൻ ഫോട്ടോകൾ പുറത്തു വന്നു. ആരാധകർ വലിയ ആവേശത്തോടെയാണ് ചിത്രത്തിന്റെ വിശേഷങ്ങൾക്ക് കാതോർക്കുന്നത്.
ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂർ തന്നെയാണ് ദൃശ്യം 2വിന്റെ നിർമ്മാണം. ജീത്തു ജോസഫ് തന്നെയാണ് രചനയും സംവിധാനവും നിർവ്വഹിക്കുന്നത്. ദൃശ്യം 2വിന്റെ ചിത്രീകരണത്തിനിടെയുള്ള മോഹൻലാലും മീനയും എസ്തെറും അൻസിബയും ഉൾപ്പെടുന്ന പ്രൊമോഷണൽ ഫോട്ടോകളാണ് അണിയറ പ്രവർത്തകർ പുറത്തു വിട്ടിരിക്കുന്നത്.
ദൃശ്യം ഒന്നാം ഭാഗത്തിൽ അണിനിരന്ന താരനിരയിൽ മിക്കവരും രണ്ടാം ഭാഗത്തിലും അഭിനയിക്കുന്നുണ്ട്. മോഹൻലാലിന് പുറമെ മീന, അൻസിബ, എസ്തർ, എന്നിവർ കുടുംബാംഗങ്ങളെ വീണ്ടും അവതരിപ്പിക്കുന്നു. സിദ്ദിഖിനും ആശാ ശരത്തിനും പുറമെ സായ്കുമാർ, മുരളി ഗോപി, ഗണേഷ് കുമാർ, സുമേഷ്, ആദം അയൂബ്, അഞ്ജലി നായർ, അജിത് കൂത്താട്ടുകുളം എന്നിവരും ചിത്രത്തിൽ അഭിനയിക്കുന്നു.
ഒരു ദുരന്തത്തിൽ നിന്നും കുടുംബത്തെ കൗശലപൂർവ്വം രക്ഷിച്ച ജോർജുകുട്ടിയുടേയും കുടുംബത്തിന്റേയും പിന്നിടുള്ള ജീവിതമാണ് ദൃശ്യം – 2 വിലൂടെ പറയുന്നതെന്ന് സംവിധായകൻ ജീത്തു ജോസഫ് വിശദീകരിക്കുന്നു. വൈകാരിക മുഹൂർത്തങ്ങൾക്കും സസ്പെൻസിനും പ്രാധാന്യം നൽകിയാണ് ചിത്രം ഒരുക്കുന്നത്.
അനിൽ ജോൺസൺ സംഗീത സംവിധാനം നിർവ്വഹിക്കുന്ന ദൃശ്യം 2ന്റെ ഛായാഗ്രാഹകൻ സതീഷ് കുറുപ്പാണ്. വിനായകൻ എഡിറ്റിംഗ് നിർവ്വഹിക്കുന്നു. ലിൻഡ ജീത്തുവാണ് വസ്ത്രാലങ്കാരം. കൊച്ചി, തൊടുപുഴ എന്നിവിടങ്ങളിലായി ചിത്രീകരണം പൂർത്തിയാകുന്ന ഈ ചിത്രം ആശീർവാദ് റിലീസാണ് പ്രദർശനത്തിനെത്തിക്കുന്നത്.
കർശനമായ കൊവിഡ് മാനദണ്ഡങ്ങൾക്ക് വിധേയമായിട്ടാണ് ചിത്രത്തിന്റെ ഷൂട്ടിംഗ് പുരോഗമിക്കുന്നത്. അന്താരാഷ്ട്ര കായിക മേളകൾക്ക് ഒരുക്കിയിരിക്കുന്ന അതേ മാതൃകയിലുള്ള നിയന്ത്രണങ്ങളാണ് ഷൂട്ടിംഗിൽ പാലിക്കുന്നതെന്ന് അണിയറ പ്രവർത്തകർ വ്യക്തമാക്കുന്നു.
