വാഷിംഗ്ടൺ: ചൈന നിയമങ്ങളനുസരിച്ച് തന്നെയാണോ പ്രവർത്തിക്കുന്നതെന്ന് ഉറപ്പു വരുത്തുമെന്നും ലോകാരോഗ്യ സംഘടനയിൽ യു.എസ് വീണ്ടും അംഗമാവുമെന്നും നിയുക്ത അമേരിക്കൻ പ്രസിഡണ്ട് ജോ ബൈഡൻ.
പ്രസിഡൻഷ്യൽ ചർച്ചകൾക്കിടയിൽ, ചൈനയുടെ മോശം ഇടപെടലുകൾക്കെതിരെ അമേരിക്ക കടുത്ത ശിക്ഷാ നടപടികൾ സ്വീകരിക്കുമോയെന്ന ചോദ്യത്തിനു മറുപടി നൽകുകയായിരുന്നു അദ്ദേഹം. ചൈനക്കെതിരെ കടുത്ത നടപടികൾ സ്വീകരിക്കാനല്ല, ചൈന നിയമങ്ങളനുസരിച്ച് തന്നെയാണോ പ്രവർത്തിക്കുന്നതെന്ന് ഉറപ്പുവരുത്താനാണ് താൻ പദ്ധതിയിട്ടിട്ടുള്ളതെന്ന് ബൈഡൻ വ്യക്തമാക്കി.
ജോ ബൈഡന്റെ ജന്മനാടായ വിൽമിങ്ട്ടണിൽ വെച്ചു നടന്ന ഗവർണർമാരുടെ യോഗത്തിലാണ് അദ്ദേഹം ഇക്കാര്യം പറഞ്ഞത്. ലോകാരോഗ്യ സംഘടനയിൽ വീണ്ടും അംഗമായതിനുശേഷം മറ്റു ലോകരാജ്യങ്ങളോടൊപ്പം നിന്ന് ചൈനയ്ക്കു മനസിലാവുന്ന ശരിയായ വഴികൾ ചൂണ്ടിക്കാണിക്കുമെന്ന് ബൈഡൻ കൂട്ടിച്ചേർത്തു. ഈ വർഷം ഏപ്രിലിൽ അമേരിക്കൻ പ്രസിഡന്റ് ഡൊണാൾഡ് ട്രംപ് ലോകാരോഗ്യ സംഘടനയിൽ നിന്നും ഔദ്യോഗികമായി പിന്മാറുകയാണെന്ന് അറിയിച്ചിരുന്നു.
കോവിഡ് വിഷയത്തിൽ ലോകാരോഗ്യ സംഘടന ചൈനയ്ക്ക് അനുകൂലമായ നിലപാട് എടുക്കുന്നുവെന്ന് ആരോപിച്ചാണ് അന്ന് ട്രംപ് സംഘടനയിൽ നിന്നും പിന്മാറാനുള്ള തീരുമാനമെടുത്തത്.
