ന്യൂഡൽഹി: ബംഗാൾ സന്ദർശനത്തിനിടെ ബിജെപി ദേശീയ അധ്യക്ഷൻ ജെ.പി നദ്ദയുടെ വാഹനവ്യൂഹത്തിന് നേരെ തൃണമൂൽ ‘ഗുണ്ടകളുടെ’ ആക്രമണമുണ്ടായ സംഭവത്തിൽ സംസ്ഥാന പോലീസ് മേധാവിയ്ക്ക് കത്തയച്ച് സിആർപിഎഫ്. കേന്ദ്ര ആഭ്യന്തരമന്ത്രി അമിത് ഷായുടെ സന്ദർശനവേളയിൽ ഇത്തരത്തിലുള്ള പ്രവർത്തികൾ ആവർത്തിക്കാതെ ശ്രദ്ധിക്കണമെന്നും അമിത് ഷായ്ക്ക് മതിയായ സുരക്ഷയൊരുക്കണമെന്നും കത്തിൽ ആവശ്യപ്പെട്ടിട്ടുണ്ട്.
ഡിസംബർ 9, 10 ദിവസങ്ങളിൽ നടന്ന സംഭവങ്ങളുടെ വിശദാംശങ്ങളാണ് സിആർപിഎഫ് സംസ്ഥാന പോലീസ് മേധാവിയെ അറിയിച്ചിട്ടുള്ളത്. നദ്ദയുടെ വാഹനവ്യൂഹത്തിന് നേരെ ആക്രമണമുണ്ടായ സമയത്ത് ആവശ്യത്തിന് പോലീസ് സുരക്ഷ ഉണ്ടായിരുന്നില്ലെന്ന് കത്തിൽ പറയുന്നു. മാത്രമല്ല, സംസ്ഥാനം സന്ദർശിക്കുന്ന വിവിഐപികൾക്ക് പോലീസ് കൃത്യമായി സുരക്ഷ ഒരുക്കണമെന്നും കത്തിൽ നിർദേശിച്ചിട്ടുണ്ട്. സിആർപിഎഫിനാണ് ദേശീയ നേതാക്കൾ ഉൾപ്പെടെയുള്ള വിവിഐപികളുടെ സുരക്ഷാ ചുമതലയുള്ളത്. സിആർപിഎഫ് ഇത് നടപ്പാക്കുന്നത് പ്രാദേശിക പോലീസിന്റെ സഹകരണത്തോട് കൂടിയാണ്.
ജെ.പി നദ്ദയുടെ സന്ദർശനവേളയിൽ പോലീസിൽ നിന്നും കൃത്യമായ ഏകോപനമുണ്ടായില്ലെന്ന് കത്തിൽ സൂചിപ്പിക്കുന്നു. ഡിസംബർ ഒമ്പതിനാണ് ഡയമണ്ട് ഹാർബറിലേക്കുള്ള യാത്രാമധ്യേ നദ്ദയുടെ വാഹനവ്യൂഹത്തിന് നേരെ ആക്രമണമുണ്ടായത്.
Discussion about this post