തിരുവനന്തപുരം: അനില് പനച്ചൂരാന്റെ മൃതദേഹം പോസ്റ്റ്മോര്ട്ടം ചെയ്യണമെന്ന് കുടുംബം. പോസ്റ്റ്മോര്ട്ടം വേണമെന്ന് തിരുവനന്തപുരത്തെ സ്വകാര്യ ആശുപത്രി അധികൃതര് നിര്ദേശിച്ചതിനെത്തുടര്ന്ന് സമ്മതം അറിയിച്ചു. ഇന്നലെ രാത്രിയാണ് കവിയും ഗാനരചയിതാവുമായ അനില് പനച്ചൂരാന് അന്തരിച്ചത്. തിരുവനന്തപുരം മെഡിക്കല് കോളേജില് പോസ്റ്റ്മോര്ട്ടം നടത്തിയ ശേഷം സംസ്കാര സമയം തീരുമാനിക്കും.
ഞായറാഴ്ച രാവിലെ ചെട്ടികുളങ്ങര ക്ഷേത്രത്തില് പോകാനായി വീട്ടില് നിന്നിറങ്ങിയ അനില് വഴിയില് കുഴഞ്ഞുവീഴുകയായിരുന്നു. തുടര്ന്ന് മാവേലിക്കരയിലെയും കരുനാഗപ്പള്ളിയിലെയും സ്വകാര്യ ആശുപത്രിയില് പ്രവേശിപ്പിച്ച അദ്ദേഹത്തെ പിന്നീട് ഗുരുതരാവസ്ഥയില് തിരുവനന്തപുരം കിംസ് ആശുപത്രിയില് എത്തിച്ചെങ്കിലും ജീവന് രക്ഷിക്കാനായില്ല.
അദ്ദേഹം കോവിഡ് ബാധിതനായിരുന്നുവെന്ന് ആശുപത്രി അധികൃതര് അറിയിച്ചു. ഹൃദയാഘാതമാണ് മരണ കാരണമെന്നാണ് പുറത്തുവരുന്ന വിവരം. ആലപ്പുഴ ജില്ലയില് കായംകുളം ഗോവിന്ദമുട്ടത്ത് വാരണപ്പള്ളി പനച്ചൂര് വീട്ടില് ഉദയഭാനു- ദ്രൗപതി ദമ്ബതികളുടെ മകനായി 1965 നവംബര് 20നാണ് ജനനം. അനില്കുമാര് പി.യു എന്നാണ് യഥാര്ത്ഥ പേര്. നങ്ങ്യാര്കുളങ്ങര ടി.കെ.എം. കോളേജ്, തിരുവനന്തപുരം ലോ അക്കാഡമി, വാറംകല് കാകദീയ സര്വകലാശാല എന്നിവിടങ്ങളിലായി വിദ്യാഭ്യാസം പൂര്ത്തിയാക്കി.
Discussion about this post