ഡൽഹി: കേന്ദ്ര ബജറ്റിൽ പ്രതിരോധ മേഖലക്ക് വൻ തുക നീക്കി വെച്ച് ധനകാര്യ വകുപ്പ് മന്ത്രി നിർമ്മല സീതാരാമൻ. 4.78 ലക്ഷം കോടി രൂപയാണ് ധനകാര്യ മന്ത്രി പ്രതിരോധ മേഖലക്ക് വേണ്ടി വകയിരുത്തിയിരിക്കുന്നത്. കഴിഞ്ഞ തവണത്തേതിൽ നിന്നും 7.4 ശതമാനം കൂടുതലാണ് ഇത്. 4.71 ലക്ഷം കോടിയാണ് പ്രതിരോധ മേഖലയ്ക്കായി കഴിഞ്ഞ വർഷം നീക്കി വെച്ചിരുന്നത്.
ആയുധങ്ങള് വാങ്ങുന്നതിനും ആധുനികവല്ക്കരണത്തിനുമായി 1.35 ലക്ഷം കോടി രൂപ ചെലവഴിക്കും. റൈഫിളുകള്, മിസൈലുകള്, ലാന്ഡ് സിസ്റ്റം തുടങ്ങിയവയായിരിക്കും ഇതുപയോഗിച്ച് വാങ്ങുക. കഴിഞ്ഞ തവണ ആയുധങ്ങള് വാങ്ങുന്നതിനായി 1.13 ലക്ഷം കോടിയായിരുന്നു ചെലവഴിച്ചിരുന്നത്.
അതിർത്തിയിൽ ചൈനയുമായി സംഘര്ഷം നിലനില്ക്കുന്നതിന്റെ പശ്ചാത്തലത്തിലാണ് പ്രതിരോധമേഖലയ്ക്കായി ഇത്രയും തുക ധനകാര്യമന്ത്രാലയം ബജറ്റില് നീക്കിവെക്കുന്നത് എന്നത് ശ്രദ്ധേയമാണ്. 2021-22 സാമ്പത്തിക വര്ഷത്തില് പ്രതിരോധമേഖലയ്ക്ക് 4.78 ലക്ഷം കോടി മാറ്റിവെച്ചുകൊണ്ട് പ്രതിരോധ ബജറ്റ് വര്ധിപ്പിച്ചതില് പ്രധാനമന്ത്രിക്കും ധനമന്ത്രിക്കും നന്ദി അറിയിക്കുന്നതായി രാജ്യരക്ഷാ മന്ത്രി രാജ്നാഥ് സിംഗ് ട്വീറ്റ് ചെയ്തു.
Discussion about this post