നീലേശ്വരം: മടിക്കൈ ബങ്കളം കക്കാട് ഗവ. ഹൈസ്കൂളിലെ ഓണ്ലൈന് ക്ലാസിനിടെ വിദേശത്തു നിന്നും അജ്ഞാതന് നുഴഞ്ഞുകയറി. അശ്ലീല കമന്റുകള് പോസ്റ്റ് ചെയ്തതോടെ അധ്യാപകന് ക്ലാസ് നിര്ത്തിവെച്ച് വിദ്യാര്ഥികളോട് പുറത്തുപോകാന് ആവശ്യപ്പെട്ടു. +1 (404) 909 8695 എന്ന നമ്പറാണ് വിദേശത്തുനിന്നും, ഗൂഗിൾ മീറ്റ് വഴിയുള്ള മൊബൈല് ക്ലാസില് നുഴഞ്ഞുകയറിയത്.
ഈ വിദേശ നമ്പർ ഓണ്ലൈന് ക്ലാസില് നുഴഞ്ഞുകയറിയത് ആരുടെയും ശ്രദ്ധയില്പെട്ടിരുന്നില്ല. ക്ലാസ് നടന്നുകൊണ്ടിരിക്കെയാണ് അശ്ലീല കമന്റുകളും സംഭാഷണങ്ങളും വരാന് തുടങ്ങിയത്. ഇതോടെയാണ് ക്ലാസില് പുറത്തുനിന്നുള്ള ആരോ നുഴഞ്ഞുകയറിയതായി വ്യക്തമായത്. സ്ഥിതി വഷളാകുന്ന ഘട്ടം എത്തിയപ്പോഴേക്കും ക്ലാസ് നിര്ത്തിവെച്ച് അധ്യാപകന് കുട്ടികളോട് ലിങ്കില്നിന്ന് പുറത്തുപോകാന് ആവശ്യപ്പെടുകയായിരുന്നു. മലയാളത്തിലും അറബിയിലുമാണ് അശ്ലീലം പറഞ്ഞതെന്ന് സ്കൂള് അധികൃതര് പറഞ്ഞു. ഏതെങ്കിലും വിദ്യാര്ഥിയില് നിന്നായിരിക്കാം ലിങ്ക് ഷെയര് ചെയ്യപ്പെട്ടതെന്നാണ് സംശയിക്കുന്നത്.
സംഭവത്തെക്കുറിച്ച് സൈബര് സെല്ലിലും ബന്ധപ്പെട്ട അധികാരികള്ക്കും പരാതി നല്കാനാണ് തീരുമാനം. വിദ്യാര്ഥികള് ഒരുകാരണവശാലും ക്ലാസിെന്റ ലിങ്ക് പുറത്ത് ഷെയര് ചെയ്യരുതെന്നാണ് അധ്യാപകര് അഭ്യര്ഥിക്കുന്നത്. പല സ്കൂളുകളിലും ഇത്തരത്തില് അജ്ഞാതര് നുഴഞ്ഞു കയറുന്നുണ്ടെന്നും വിദ്യാര്ഥിനികളെ ഉള്പ്പെടെ വശത്താക്കാനുമുള്ള ശ്രമങ്ങള് നടക്കുന്നുണ്ടെന്ന പരാതികള് ഉയരുന്നുണ്ട്. ഹെഡ്മാസ്റ്റര് വിജയന് നീലേശ്വരം പൊലീസില് പരാതി നല്കി.
Discussion about this post