ദാരിദ്ര്യ രേഖക്ക് താഴെയുള്ളവർക്ക് സൗജന്യ ഗ്യാസ് കണക്ഷൻ; ഉജ്ജ്വല 2.0 ഓഗസ്റ്റ് 10ന് പ്രധാനമന്ത്രി ഉദ്ഘാടനം ചെയ്യും

ഡൽഹി: ദാരിദ്ര്യ രേഖക്ക് താഴെയുള്ള കുടുംബങ്ങൾക്ക് സൗജന്യ ഗ്യാസ് കണക്ഷൻ നൽകുന്ന പ്രധാനമന്ത്രി ഉജ്ജ്വല യോജനയുടെ രണ്ടാം ഘട്ടം നാളെ പ്രധാനമന്ത്രി നരേന്ദ്ര മോദി ഉദ്ഘാടനം ചെയ്യും. ഉത്തർപ്രദേശിലെ മഹോബയിൽ എൽപിജി കണക്ഷനുകൾ കൈമാറിക്കൊണ്ടായിരിക്കും ഉദ്ഘാടനം. വീഡിയോ കോൺഫറൻസിംഗ് വഴി ഉച്ചയ്‌ക്ക് 12:30 ന് നടക്കുന്ന പരിപാടിയിൽ, കേന്ദ്ര പെട്രോളിയം പ്രകൃതി വാതക മന്ത്രിയും ഉത്തർ പ്രദേശ് മുഖ്യമന്ത്രിയും പങ്കെടുക്കും.

ബിപിഎൽ കുടുംബങ്ങളിലെ 5 കോടി വനിതകൾക്ക് സൗജന്യ ഗ്യാസ് കണക്ഷൻ നൽകാൻ ലക്ഷ്യമിട്ടുള്ള പ്രധാനമന്ത്രി ഉജ്ജ്വല യോജന 2016ലാണ് ആരംഭിച്ചത്. 2018 ഏപ്രിലിൽ ഈ പദ്ധതി വിപുലീകരിച്ച് ലക്ഷ്യം 8 കോടി എൽപിജി കണക്ഷനുകളായി പരിഷ്കരിച്ചു. ലക്ഷ്യമിട്ട തീയതിക്ക് ഏഴ് മാസം മുമ്പ് 2019 ഓഗസ്റ്റിൽ ഈ ലക്ഷ്യം കൈവരിച്ചു.

പണമടയ്ക്കാതെ ലഭിക്കുന്ന ഗ്യാസ് കണക്ഷനോടൊപ്പം ആദ്യ റീഫില്ലും ഹോട്ട് പ്ലേറ്റും ഗുണഭോക്താക്കൾക്ക് ഉജ്ജ്വല 2.0 ൽ സൗജന്യമായി ലഭിക്കും. പദ്ധതിയിൽ ചേരാൻ നടപടിക്രമങ്ങളും ലഘൂകരിച്ചിട്ടുണ്ട്.