മുൻ ഇന്ത്യൻ അണ്ടർ 19 ക്രിക്കറ്റ് ക്യാപ്ടൻ ഉന്മുക്ത് ചന്ദ് ബിഗ് ബാഷ് ലീഗിൽ അരങ്ങേറി. ഓസ്ട്രേലിയൻ ലീഗിൽ കളിക്കുന്ന ആദ്യ ഇന്ത്യൻ പുരുഷ താരമാണ് ഉന്മുക്ത് ചന്ദ്. മെൽബൺ റെനഗേഡ്സ് താരമായ ഉന്മുക്ത് ചന്ദിന്റെ അരങ്ങേറ്റം ഹോബാർട്ട് ഹരിക്കേൻസിനെതിരെ ആയിരുന്നു.
The new colours suit you, @UnmuktChand9 ❤️#GETONRED pic.twitter.com/aJKcnv6aIP
— Melbourne Renegades (@RenegadesBBL) January 18, 2022
മെൽബണിൽ ആരോൺ ഫിഞ്ച് നയിച്ച ടീമിൽ ബാറ്റിംഗ് ഓർഡറിൽ നാലാം സ്ഥാനത്തായിരുന്നു ഉന്മുക്ത് ചന്ദിന്റെ ബിഗ് ബാഷ് അരങ്ങേറ്റം. ഇന്ത്യൻ അണ്ടർ 19 ടീമിന് വേണ്ടി ലോകകപ്പ് ഉയർത്തിയിട്ടുള്ള ഉന്മുക്ത് ചന്ദിനെ വലിയ ആവേശത്തോടെയാണ് ക്രിക്കറ്റ് ഓസ്ട്രേലിയ സ്വാഗതം ചെയ്തത്. ‘പുതിയ നിറങ്ങൾ താങ്കൾക്ക് യോജിക്കുന്നു‘ എന്ന ട്വീറ്റിൽ ഉന്മുക്തിന്റെ ചിത്രം ചേർത്തായിരുന്നു മെൽബൺ റെനഗേഡ്സിന്റെ സ്വീകരണം.
എന്നാൽ ബിഗ് ബാഷിലെ ആദ്യ മത്സരത്തിൽ ഉന്മുക്ത് ചന്ദിന് ശോഭിക്കാൻ ആയില്ല. മത്സരത്തിന്റെ പതിനെട്ടാം ഓവറിൽ എട്ട് പന്തിൽ 6 റൺസ് എടുത്ത താരത്തെ സന്ദീപ് ലാമിച്ചാനെ മടക്കി. മത്സരത്തിൽ 6 റൺസിന് ടീം തോൽക്കുകയും ചെയ്തു. 13 മത്സരങ്ങളിൽ നിന്നും 16 പോയിന്റുമായി ലീഗിൽ ഏറ്റവും പിന്നിലാണ് റെനഗേഡ്സ്.
