സിംബാബ്‌വെയ്‌ക്കെതിരായ രണ്ടാം ഏകദിന മത്സരത്തിൽ തകർപ്പൻ സെഞ്ചുറിയുമായി നയിച്ച ഇന്ത്യൻ മുൻ നായിക ഹർമൻപ്രീത് കൗറിന് ഡ്രെസ്സിംഗ് റൂമിൽ എഴുന്നേറ്റു നിന്ന് കയ്യടിച്ച് നായിക സ്മൃതി മന്ദാന. വഡോദരയിലെ ബി.സി.എ സ്റ്റേഡിയത്തിൽ നടന്ന മത്സരത്തിൽ ഇന്ത്യ തുടക്കത്തിൽ തന്നെ തകർച്ചയെ നേരിട്ട ഘട്ടത്തിൽ രക്ഷകയായ ഹർമൻപ്രീത് തന്റെ കരിയറിലെ എട്ടാം ഏകദിന സെഞ്ചുറിയാണ് തികച്ചത്. ക്യാപ്റ്റൻ സ്ഥാനത്തുനിന്നും ഹർമൻപ്രീതിനെ മാറ്റി മന്ദാനയ്ക്ക് ചുമതല നൽകിയതിന് പിന്നാലെ ഇരുവരും തമ്മിൽ ഭിന്നതയിലാണെന്ന തരത്തിലുള്ള വാർത്തകൾ പ്രചരിച്ചിരുന്ന സാഹചര്യത്തിലാണ് ഈ സ്നേഹനിർഭരമായ നിമിഷം ശ്രദ്ധ നേടിയത്.
101 പന്തുകളിൽ നിന്നാണ് ഹർമൻപ്രീത് സെഞ്ചുറി നേട്ടം കൈവരിച്ചത്. ഡ്രെസ്സിംഗ് റൂമിൽ സ്മൃതി മന്ദാനയും സഹതാരങ്ങളും ഒന്നടങ്കം എഴുന്നേറ്റു നിന്ന് അഭിനന്ദിച്ചപ്പോഴും മിതമായ രീതിയിൽ മാത്രം ആഹ്ലാദം പങ്കുവെച്ച താരം കളിയിൽ ശ്രദ്ധ കേന്ദ്രീകരിക്കുകയായിരുന്നു. 121 പന്തുകളിൽ നിന്ന് 15 ഫോറുകളടക്കം 126 റൺസ് നേടിയാണ് ഹർമൻപ്രീത് ഒടുവിൽ പുറത്തായത്. 2024 ജൂണിന് ശേഷം സ്വന്തം മണ്ണിൽ ഹർമൻപ്രീത് നേടുന്ന ആദ്യ ഏകദിന സെഞ്ചുറിയാണിത്. ഇതോടെ ഇന്ത്യക്കായി ഏറ്റവും കൂടുതൽ ഏകദിന സെഞ്ചുറികൾ നേടിയ താരങ്ങളുടെ പട്ടികയിൽ മുൻ ക്യാപ്റ്റൻ മിതാലി രാജിനെ മറികടക്കാനും ഹർമൻപ്രീതിന് സാധിച്ചു. 14 സെഞ്ചുറികളുമായി സ്മൃതി മന്ദാനയാണ് ഈ പട്ടികയിൽ ഒന്നാമതുള്ളത്.
മത്സരത്തിൽ സ്മൃതി മന്ദാനയെയും ഷെഫാലി വർമ്മയെയും തുടക്കത്തിലേ നഷ്ടപ്പെട്ട് 19 റൺസിന് 2 വിക്കറ്റ് എന്ന നിലയിൽ പതറിയ ഇന്ത്യയെ ഹർമൻപ്രീതും പ്രതിക റാവലും ചേർന്ന് രക്ഷിച്ചെടുക്കുകയായിരുന്നു. മൂന്നാം വിക്കറ്റിൽ ഇരുവരും ചേർന്ന് 124 റൺസിന്റെ കൂട്ടുകെട്ടുണ്ടാക്കി. തുടർന്ന് ദീപ്തി ശർമ്മയുമായും ചേർന്ന് ഹർമൻപ്രീത് സ്കോർ ബോർഡ് മുന്നോട്ട് നയിച്ചു. സിംബാബ്‌വെയ്‌ക്കെതിരായ ട്വന്റി-20 പരമ്പരയിലെ മൂന്നാം മത്സരത്തിൽ 41 പന്തിൽ പുറത്താകാതെ 91 റൺസ് അടിച്ച് കൂട്ടി ഫോമിലായിരുന്ന താരം അതേ മികച്ച ഫോം ഏകദിന പരമ്പരയിലും തുടരുകയായിരുന്നു.
