ഡൽഹി: രാജ്യസുരക്ഷയ്ക്ക് ഭീഷണി ഉയർത്തുന്നതായി കണ്ടെത്തിയതിനെ തുടർന്ന് 54 ചൈനീസ് ആപ്പുകൾ കൂടി നിരോധിക്കാനൊരുങ്ങി ഇന്ത്യ. നിരോധിക്കാൻ തീരുമാനിച്ചിരിക്കുന്ന ആപ്പുകളുടെ പട്ടിക ഉടൻ കേന്ദ്ര സർക്കാർ പുറത്തു വിടുമെന്ന് വാർത്താ ഏജൻസി റിപ്പോർട്ട് ചെയ്യുന്നു. കഴിഞ്ഞ വർഷം പബ്ജി, ടിക് ടോക്, വീചാറ്റ്, അലി എക്സ്പ്രസ്സ് തുടങ്ങി നൂറ് കണക്കിന് ചൈനീസ് ആപ്പുകൾ ഇന്ത്യ നിരോധിച്ചിരുന്നു.
ഐടി നിയമത്തിലെ 69എ വകുപ്പ് പ്രകാരമായിരുന്നു ഇന്ത്യ ചൈനീസ് ആപ്പുകൾ നിരോധിച്ചത്. രാജ്യത്തിന്റെ പരാമാധികാരത്തിനും അഖണ്ഡതയ്ക്കും പ്രതിരോധ മേഖലയ്ക്കും നിയമവാഴ്ചയ്ക്കും ഭീഷണി ഉയർത്തുന്ന പ്രവർത്തനങ്ങളിൽ ഏർപ്പെടുന്നു എന്ന് വ്യക്തമായ സാഹചര്യത്തിലാണ് നിരോധനമെന്ന് കേന്ദ്ര സർക്കാർ വ്യക്തമാക്കിയിരുന്നു.
