ന്യൂഡല്‍ഹി: ഇന്ത്യയുടെ ഡിജിറ്റല്‍ സ്വപ്‌നങ്ങള്‍ക്ക് ശക്തി പകരാന്‍ റിസര്‍വ് ബാങ്കിന്റെ പുതിയ ഡിജിറ്റല്‍ കറന്‍സി ‘ഇ-റുപ്പി’ ഇന്ന് പുറത്തിറങ്ങും. ചില്ലറ ഇടപാടുകള്‍ക്കായി ആദ്യ ഘട്ടം പരീക്ഷണാടിസ്ഥാനത്തില്‍ മുംബൈ, ഡല്‍ഹി, ബെംഗളുരു, ഭുവനേശ്വര്‍ തുടങ്ങിയ നാല് നഗരങ്ങളിലാണ് അവതരിപ്പിക്കുന്നത്.
ഇ-റുപ്പി, പണമിടപാടുകള്‍ കൂടുതല്‍ വേഗത്തിലാക്കുമെന്ന് ആര്‍ബിഐ മുന്‍പ് തന്നെ വ്യക്തമാക്കിയിരുന്നു. ഇപ്പോള്‍ പ്രാബല്യത്തിലുള്ള നാണയങ്ങളുടേയും നോട്ടുകളുടേയും സമാന മൂല്യത്തിലുള്ള ടോക്കണുകളായാണ് ഇവ പുറത്തിറക്കുന്നത്. എസ്ബിഐ അടക്കം യെസ് ബാങ്ക്, ഐസിഐസിഐ, ഐഡിഎഫ്‌സി ഫസ്റ്റ് ബാങ്ക് തുടങ്ങിയ നാല് ബാങ്കുകളാണ് ആദ്യഘട്ടത്തില്‍ ഇതിനായി ആര്‍ബിഐയുമായി സഹകരിക്കുക. ബാങ്ക് ഓഫ് ബറോഡ, യൂണിയന്‍ ബാങ്ക്, എച്ച്ഡിഎഫ്‌സി, കൊട്ടക് മഹീന്ദ്ര തുടങ്ങിയ ബാങ്കുകളെ അടുത്ത ഘട്ടങ്ങളില്‍ ഉള്‍പ്പെടുത്താനും പദ്ധതിയുണ്ട്. ഡിജിറ്റല്‍ വാലറ്റില്‍ മൊബൈല്‍ ഫോണ്‍ വഴി ഉപഭോക്താക്കള്‍ക്ക് ഇടപാടുകള്‍ നടത്താനാകുമെന്നതിനാല്‍ പുതിയ സംവിധാനം കൂടുതല്‍ സുരക്ഷിതത്വവും സുഗമവുമാകുമെന്നാണ് വിലയിരുത്തല്‍.
പദ്ധതിയുടെ രണ്ടാം ഘട്ടത്തില്‍ കൊച്ചി ഉള്‍പ്പെടെ ഒന്‍പത് നഗരങ്ങളിലേക്കും ഇ-റുപ്പി വ്യാപിപ്പിക്കും.
Discussion about this post