ദോഹ: ഇന്നലെ നടന്ന അര്‍ജന്റീന-നെതര്‍ലന്‍ഡ് ക്വാര്‍ട്ടര്‍ ഫൈനലില്‍ മെസ്സി ടീം ജയിച്ചെങ്കിലും മഞ്ഞക്കാര്‍ഡുകളുടെ പെരുമഴയായിരുന്നു കളിയിലുടനീളം കണ്ടത്. കളി നിയന്ത്രിച്ച സ്പാനിഷ് റഫറി ഇടതടവില്ലാതെ മഞ്ഞക്കാര്‍ഡുകള്‍ പുറത്തെടുത്തു. ഇതില്‍ അര്‍ജന്റീനയുടെ സൂപ്പര്‍താരം ലയണല്‍ മെസിയെ കൂടാതെ മറ്റ് ഏഴോളം അര്‍ജന്റിന താരങ്ങളും നെതര്‍ലന്‍ഡ് താരങ്ങളും ഉള്‍പ്പെടും. കളി കഴിഞ്ഞപ്പോള്‍ റഫറിയുടെ ചില തീരുമാനങ്ങളെ മെസ്സി അടക്കം നിരവധിയാളുകള്‍ കനത്ത ഭാഷയില്‍ വിമര്‍ശിക്കുകയും ചെയ്തു.
റഫറിയുടെ കാര്‍ഡ് എടുക്കലുകള്‍ മല്‍സരത്തിന്റെ ആവേശം കെടുത്തിയതായി എല്ലാവരും സമ്മതിക്കുന്നുണ്ട്. നെതര്‍ലന്‍ഡിനെതിരെ വിജയിച്ച ശേഷം നടന്ന അഭിമുഖത്തിനിടെയാണ് സൂപ്പര്‍ താരം, കളി നിയന്ത്രിച്ച അന്റോണിയോ മിഗ്വേല്‍ മതേവൂ ലാഹോസിനെതിരെ രോഷപ്രകടനം നടത്തിയത്. ഇതുപോലെയുള്ള റഫറിയെ ജോലി ഏല്‍പ്പിക്കരുതെന്നും അദ്ദേഹത്തിന് തീരെ നിലവാരമില്ലെന്നും മെസ്സി തുറന്നടിച്ചു. റഫറിയെ കുറിച്ച് ഞാന്‍ കൂടുതലായൊന്നും പറയാന്‍ ആഗ്രഹിക്കുന്നില്ല, അത് പിന്നീട് വിലക്ക് ഏര്‍പ്പെടുത്താന്‍ ഇടയാക്കും, താരം വെളിപ്പെടുത്തി. അയാള്‍ എന്താണ് നോക്കുന്നത്, വിഡ്ഢി എന്നു കൂടി സ്പാനിഷ് ഭാഷയില്‍ മെസി പറഞ്ഞതോടെ അഭിമുഖം നടത്തുന്നയാള്‍ ഇടപെട്ട് രംഗം ശാന്തമാക്കിയതായും റിപ്പോര്‍ട്ടുകളുണ്ട്.
Discussion about this post