അടിയന്തരാവസ്ഥക്കാലത്തിന് സമാനമായി അധികാരത്തിന്റെ മർക്കടമുഷ്ടി ഉപയോഗിച്ച് മാധ്യമങ്ങളെയും പ്രതിപക്ഷത്തെയും അഭിപ്രായ സ്വാതന്ത്ര്യത്തെയും അടിച്ചമർത്താനാണ് മുഖ്യമന്ത്രി വി.ഡി. സതീശനും യു.ഡി.എഫ് സർക്കാരും ശ്രമിക്കുന്നതെന്ന രൂക്ഷവിമർശനവുമായി മുൻ മുഖ്യമന്ത്രിയും പ്രതിപക്ഷനേതാവുമായ പിണറായി വിജയൻ. മുഖ്യമന്ത്രിയോട് അടുത്തബന്ധമുള്ള വ്യക്തി ലഹരിക്കേസിൽ പിടിയിലായപ്പോൾ സംസ്ഥാന സർക്കാർ ലഹരിക്കടത്തുകാരുടെ പക്ഷത്തേക്ക് മാറിപ്പോയോ എന്ന സംശയം ശക്തമാവുകയാണെന്ന് ഫേസ്ബുക്ക് കുറിപ്പിൽ അദ്ദേഹം ആരോപിച്ചു.
സംസ്ഥാനത്ത് ലഹരിക്കെതിരെ നടപ്പാക്കുന്ന ‘ഓപ്പറേഷൻ തൂഫാൻ’ പദ്ധതിയുടെ ഭാഗമായി മുഖ്യമന്ത്രിയുടെ സോഷ്യൽ മീഡിയ കോർഡിനേറ്റർ എന്ന് അവകാശപ്പെടുന്ന വ്യക്തി പിടിയിലായതുമായി ബന്ധപ്പെട്ട വാർത്തകളും താൻ നടത്തിയ വാർത്താസമ്മേളനത്തിന്റെ പ്രസ്താവനകളും സോഷ്യൽ മീഡിയയിൽ നിന്ന് നീക്കം ചെയ്യിക്കുന്നതായി പിണറായി വിജയൻ ചൂണ്ടിക്കാട്ടി. വാർത്തകൾ ഇന്ത്യയിലുള്ളവർക്ക് കാണാൻ സാധിക്കാത്ത വിധം അപ്രഖ്യാപിത സെൻസർഷിപ്പ് ഏർപ്പെടുത്തുന്ന സർക്കാരിന്റെ നടപടി ജനാധിപത്യത്തോടുള്ള വെല്ലുവിളിയാണെന്ന് അദ്ദേഹം കുറ്റപ്പെടുത്തി.
ലഹരിമരുന്ന് കടത്തിനെതിരെയുള്ള നടപടികളെ പ്രതിപക്ഷം പൂർണ്ണമായും പിന്തുണയ്ക്കുമെങ്കിലും, മുഖ്യമന്ത്രിയുടെ ഓഫീസ് ബന്ധമുള്ളവർ കുടുങ്ങുമ്പോൾ കേസ് അട്ടിമറിക്കപ്പെടുകയാണോ എന്ന് സംശയിക്കേണ്ടിയിരിക്കുന്നു. പുറത്ത് ലഹരിക്കെതിരെ കടുത്ത നടപടികൾ ആഘോഷമാക്കുമ്പോൾ അകത്ത് കുറ്റവാളികൾക്ക് അകമഴിഞ്ഞ പിന്തുണ നൽകുന്ന പ്രഹസനമാണ് നടക്കുന്നതെന്നും ആഭ്യന്തര മന്ത്രി രമേഷ് ചെന്നിത്തല ഇതിൽ നിലപാട് വ്യക്തമാക്കണമെന്നും പിണറായി വിജയൻ ആവശ്യപ്പെട്ടു. ഒരു മയക്കുമരുന്ന് കടത്തുകാരന്റെ ദാസ്യപ്പണിയിലൂടെ സർക്കാരിന്റെ വിരുദ്ധ ലഹരി പ്രതിരോധ പ്രവർത്തനങ്ങൾ പ്രഹസനമാക്കരുതെന്നും അദ്ദേഹം കൂട്ടിച്ചേർത്തു.
