കുട്ടിക്കാലത്ത് അച്ഛനോട് വാശി പിടിച്ച് വാങ്ങിക്കഴിച്ച ആ നീല പെട്ടിയിലെ ഐസ്ക്രീം ഓർമ്മയുണ്ടോ?…. എസി മുറികളിലിരുന്ന് വലിയ പണക്കാർ മാത്രം ഐസ്ക്രീം കഴിച്ചിരുന്ന ആ കാലത്ത്, വൻകിട വിദേശ ബ്രാൻഡുകളെ വെല്ലുവിളിക്കാൻ പഠനം പാതിവഴിയിലാക്കി തള്ളുവണ്ടിയുമായി തെരുവിലിറങ്ങിയ , ഒരു 21-കാരനുണ്ടായിരുന്നു! ബിസിനസ് ചെയ്യാനായി പോക്കറ്റിൽ 13,000 രൂപയുമായി ഇറങ്ങിത്തിരിച്ച്, കടലാസ് കുപ്പായമിട്ട ആ കുഞ്ഞു ഐസ്ക്രീമിലൂടെ ഭാരതത്തിന്റെ പത്മശ്രീ പുരസ്കാരം വരെ നേടിയ അദ്ദേഹത്തിൻ്റെ പേര് ആർജി ചന്ദ്രമോഗ്. അദ്ദേഹം വിറ്റത് അരുൺ ഐസ്ക്രീം…..
തള്ളുവണ്ടിയിൽ നിന്ന് തുടങ്ങി, പത്മശ്രീ പുരസ്കാരവും കടന്ന് ദക്ഷിണേന്ത്യയുടെ നെഞ്ചകം കീഴടക്കിയ ആർ. ജി. ചന്ദ്രമോഗന്റെയും അരുൺ ഐസ്ക്രീംസിന്റെയും വിജയഗാഥയിലേക്ക് നമുക്കൊന്നിറങ്ങിപ്പോകാം.” 1970 കൾ…. പഠനം പാതിവഴിയിൽ ഉപേക്ഷിക്കേണ്ടി വന്ന 21-കാരനായ ആർ. ജി. ചന്ദ്രമോഗൻ (R. G. Chandramogan) എന്ന തമിഴ്നാട്ടുകാരൻ യുവാവ്, തന്റെ കയ്യിലുണ്ടായിരുന്ന 13,000 രൂപയും മൂന്ന് ജീവനക്കാരുമായി ചെന്നൈയിലെ റോയപ്പേട്ടയിൽ 250 ചതുരശ്ര അടി മാത്രം വിസ്തീർണ്ണമുള്ള ഒരു കൊച്ചു മുറിയിൽ ‘ചന്ദ്രമോഹൻ ആൻഡ് കോ’ എന്ന പ്രസ്ഥാനം തുടങ്ങി. തള്ളുവണ്ടികളിൽ ‘ഐസ്ക്രീം ബാറുകൾ’ വിൽക്കുന്ന ഒരു എളിയ തുടക്കമായിരുന്നു അത്. അന്ന് വൻകിട ഐസ്ക്രീം ബ്രാൻഡുകളെല്ലാം മെട്രോ നഗരങ്ങളിലെ വലിയ എയർകണ്ടീഷൻ ചെയ്ത പാർലറുകളിലേക്ക് പണക്കാരെ മാത്രം ലക്ഷ്യമിട്ട് ശ്രദ്ധ കേന്ദ്രീകരിച്ചപ്പോൾ, ചന്ദ്രമോഗൻ ചിന്തിച്ചത് തികച്ചും വ്യത്യസ്തമായ ഒരു വഴിയായിരുന്നു.
“നഗരത്തിലെ പണക്കാർക്ക് മാത്രമല്ല, നാട്ടിൻപുറങ്ങളിലെ സാധാരണക്കാർക്കും ഐസ്ക്രീം കഴിക്കണം!” എന്നതായിരുന്നു അദ്ദേഹത്തിന്റെ മാസ്റ്റർ പ്ലാൻ. വൻകിട കമ്പനികൾ തിരിഞ്ഞുനോക്കാത്ത ഗ്രാമങ്ങളിലേക്കും, ചെറിയ പട്ടണങ്ങളിലേക്കും, വിനോദയാത്രാ ബസുകളിലേക്കും അദ്ദേഹം തന്റെ ബ്രാൻഡായ ‘അരുൺ’ (Arun Icecreams) എത്തിക്കാൻ തുടങ്ങി.
ഈ യാത്രയിൽ ബിസിനസ്സ് ലോകത്തെ അമ്പരപ്പിച്ച മറ്റൊരു നിയമപരമായ മാസ്റ്റർസ്ട്രോക്ക് കൂടി ചന്ദ്രമോഗൻ പുറത്തെടുത്തു. 1986-ൽ അദ്ദേഹം ‘ഹാറ്റ്സൺ ഫുഡ്സ്’ (Hatsun Foods) എന്ന കമ്പനി രൂപീകരിക്കുകയും, എന്നാൽ ‘Arun’ എന്ന ട്രേഡ്മാർക്ക് ബ്രാൻഡ് നാമം സ്വന്തം പേരിൽ തന്നെ നിലനിർത്തുകയും ചെയ്തു. കമ്പനിക്ക് ‘Arun’ എന്ന പേര് ഉപയോഗിക്കാൻ അനുവാദം നൽകുന്നതിന് പകരമായി കമ്പനിയുടെ മൊത്തം ഐസ്ക്രീം വിറ്റുവരവിന്റെ (Turnover) 1% പേറ്റന്റ് റോയൽറ്റിയായി ചന്ദ്രമോഗന് ലഭിക്കുന്ന അപൂർവ്വമായൊരു ബിസിനസ്സ് മോഡൽ അദ്ദേഹം സൃഷ്ടിച്ചു! അതായത്, ബിസിനസ്സ് നടത്തിയത് കമ്പനിയാണെങ്കിലും, ബ്രാൻഡ് നാമം തന്നെ അദ്ദേഹത്തിന്റെ ഏറ്റവും വലിയ ആസ്തിയായി മാറി. തമിഴിലും സംസ്കൃതത്തിലും ‘അരുൺ’ എന്നാൽ “സൂര്യൻ” (Sun/Surya) എന്നാണ് അർത്ഥം. ഐസ്ക്രീം ബിസിനസ്സ് പ്രധാനമായും വെയിലുമായും ചൂടുമായും ബന്ധപ്പെട്ടിരിക്കുന്ന ഒന്നായതുകൊണ്ട്, “വെയിൽ എത്രത്തോളം കടുക്കുന്നുവോ അത്രത്തോളം ഐസ്ക്രീം വിറ്റുപോകും” എന്ന ലളിതമായ ബിസിനസ്സ് തത്വത്തെ മുൻനിർത്തിയാണ് അദ്ദേഹം സൂര്യന്റെ പര്യായമായ ‘അരുൺ’ എന്ന പേര് തിരഞ്ഞെടുത്തത്
1978-ൽ ആദ്യത്തെ എക്സ്ക്ലൂസീവ് അരുൺ ഐസ്ക്രീം പാർലർ തുടങ്ങിയ കമ്പനി, 1985-ഓടെ തമിഴ്നാട്ടിൽ ഏറ്റവും കൂടുതൽ ഐസ്ക്രീം വിൽക്കുന്ന ബ്രാൻഡായി മാറി. നഗരങ്ങളിലെ സൂപ്പർമാർക്കറ്റുകളിൽ മാത്രം ഒതുങ്ങാതെ, ഓരോ ചെറിയ ഗ്രാമത്തിലെയും പലചരക്ക് കടകളിൽ സൗജന്യമായി അരുണിന്റെ ഫ്രീസറുകൾ കൊണ്ടുപോയി സ്ഥാപിച്ചുകൊടുത്തു കൊണ്ട് വിതരണ ശൃംഖലയിൽ (Distribution Network) അവർ വൻ വിപ്ലവം സൃഷ്ടിച്ചു. കാസി കസാറ്റ, ബെറി അഫെയർ, കസട്ട, നാടൻ ഇന്ത്യൻ മധുരപലഹാരങ്ങളുടെ ഫ്ലേവറുകൾ എന്നിവ അവതരിപ്പിച്ച് സാധാരണക്കാരെ അവർ തങ്ങളുടെ ആരാധകരാക്കി മാറ്റി.
1990-കളിൽ തമിഴ്നാട്, കേരളം, കർണാടക, ആന്ധ്രാപ്രദേശ് എന്നിവിടങ്ങളിലായി 700-ലധികം എക്സ്ക്ലൂസീവ് പാർലറുകളുള്ള ഭീമനായി അരുൺ പന്തലിച്ചു. ഈ ഒറ്റ ഐസ്ക്രീം ബ്രാൻഡിന്റെ വിജയത്തിൽ നിന്ന് പ്രചോദനമുൾക്കൊണ്ടാണ് ചന്ദ്രമോഗൻ പിന്നീട് ആരോക്യ മിൽക്ക് (Arokya Milk), ഹാറ്റ്സൺ ഡയറി പ്രൊഡക്ട്സ്, ആഡംബര ഐസ്ക്രീം ബ്രാൻഡായ ഇബാക്കോ (Ibaco) എന്നിവ ആരംഭിക്കുന്നത്. ഒരു കൊച്ചു ഐസ്ക്രീം കടയിൽ നിന്ന് തുടങ്ങി ഇന്ന് ഇന്ത്യയിലെ ഏറ്റവും വലിയ സ്വകാര്യ ഡയറി കമ്പനിയായ ഹാറ്റ്സൺ അഗ്രോ പ്രൊഡക്ട്സ് (Hatsun Agro Product Ltd) എന്ന സാമ്രാജ്യമായി അത് വളർന്നു!
ഇന്ത്യൻ ക്ഷീരമേഖലയ്ക്കും ബിസിനസ്സ് ലോകത്തിനും നൽകിയ സമാനതകളില്ലാത്ത സംഭാവനകൾക്ക് 2025-ൽ ഭാരത സർക്കാർ അദ്ദേഹത്തിന് ‘പത്മശ്രീ’ പുരസ്കാരം നൽകി ആദരിച്ചു. കൂടാതെ ഇന്ത്യൻ ഡയറി അസോസിയേഷൻ ലൈഫ് ടൈം അച്ചീവ്മെന്റ് അവാർഡും നൽകി. ചെന്നൈയിലെ തള്ളുവണ്ടിയിൽ വെറും 13,000 രൂപയിൽ തുടങ്ങി, പത്മശ്രീയും നേടി, ദക്ഷിണേന്ത്യയിലെ കോടിക്കണക്കിന് മനുഷ്യരുടെ നാവിൽ മധുരം നിറയ്ക്കുന്ന അരുൺ ഐസ്ക്രീംസ്, ബിസിനസ്സ് ലോകത്തെ ഏറ്റവും പ്രചോദനാത്മകമായ വിജയഗാഥകളിലൊന്നാണ്!
