ന്യൂഡെല്ഹി: ഡിസംബര് ഒമ്പതിന് അരുണാചല് പ്രദേശിലെ തവാങ്ങില് ചൈനീസ് സേന കടന്നുകയറ്റത്തിന് ശ്രമിച്ചതായി കേന്ദ്രസര്ക്കാര് സ്ഥിരീകരിച്ചതിന് പിന്നാലെ ചൈനീസ് സേനയെ ഇന്ത്യന് സൈനികര് അടിച്ചോടിക്കുന്ന ഒരു വീഡിയോ ജനം ഏറ്റെടുത്തിരിക്കുകയാണ്. തീയ്യതി വ്യക്തമല്ലാത്ത ഈ വീഡിയോയില് ചൈനീസ് സേന അതിര്ത്തി ഭേദിക്കാന് ശ്രമിക്കുന്നതും ഇന്ത്യന് സൈനികര് വടി കൊണ്ട് അടിച്ച് പിന്തിരിപ്പിക്കുന്നതുമെല്ലാം കാണാം.
അരുണാചല് പ്രദേശിലെ നിയന്ത്രണ രേഖയില് നടന്ന ഏറ്റുമുട്ടലാണ് വീഡിയോയില് ഉള്ളത്. ഡിസംബര് ഒമ്പതിന് നടന്ന ഏറ്റുമുട്ടല് എന്ന രീതിയില് വീഡിയോ പ്രചരിച്ചെങ്കിലും അത് ശരിയല്ലെന്ന് കരസേന വ്യക്തമാക്കിയിട്ടുണ്ട്. കഴിഞ്ഞ വര്ഷം നടന്ന ഏറ്റുമുട്ടലായിരിക്കാം ഇതെന്നാണ് അനുമാനം. 2020 ജൂണില് പടിഞ്ഞാറന് ലഡാക്കിലെ ഗല്വാന് താഴ്വരയില് നടന്ന ഏറ്റമുട്ടലിന് ശേഷം നടന്നതായിരിക്കും വീഡിയോയില് കാണുന്ന ഏറ്റുമുട്ടല് എന്ന് ദേശീയ മാധ്യമങ്ങള് റിപ്പോര്ട്ട് ചെയ്യുന്നു. ഗല്വാന് ഏറ്റുമുട്ടലില് 20 ഇന്ത്യന് സൈനികര് വീരമൃത്യ വരിച്ചിരുന്നു. 40 ചൈനീസ് സൈനികരും അന്ന് കൊല്ലപ്പെട്ടു.
ഇക്കഴിഞ്ഞ ഡിസംബര് ഒമ്പതിന് ചൈനീസ് സൈന്യം നടത്തിയ ഭൂമി കയ്യേറ്റത്തിന് സമാനമായ സംഭവമാണ് വീഡിയോയില് ഉള്ളത്. അതിര്ത്തി കടക്കാനുള്ള ഒരു കൂട്ടം ചൈനീസ് സൈനികരുടെ ശ്രമത്തെ ഇന്ത്യന് സൈനികര് ശക്തമായി പ്രതിരോധിക്കുന്നത് വീഡിയോയില് വ്യക്തമാണ്. നല്ല അടി കൊടുക്കാനും, ഇനി അവര് വീണ്ടും വരരുതെന്നും ഒരു ജവാന് പഞ്ചാബിയില് പറയുന്നത് വീഡിയോയില് കേള്ക്കാം.
Discussion about this post