ദിസ്പുർ : അസം വനംവകുപ്പിന്റെയും കാസിരംഗ നാഷണൽ പാർക്കിന്റെയും അഭിമാനമായിരുന്ന ഇതിഹാസ പട്രോളിംഗ് ആന ‘ജോയ്മാല’ 66-ാം വയസ്സിൽ ഓർമ്മയായി. മൂന്ന് പതിറ്റാണ്ടിലധികം നീണ്ട സമാനതകളില്ലാത്ത വന്യജീവി സംരക്ഷണ സേവനത്തിന് ശേഷമാണ് കാസിരംഗയിലെ ഏറ്റവും പ്രായം കൂടിയ വനപാലക ആനകളിലൊന്നായ ജോയ്മാല വിടവാങ്ങിയത്. വാർദ്ധക്യസഹജമായ അസുഖങ്ങളെ തുടർന്ന് ഒരു വർഷത്തോളമായി വനംവകുപ്പ് ഡോക്ടർമാരുടെ കർശന നിരീക്ഷണത്തിലും ചികിത്സയിലുമായിരുന്ന ജോയ്മാല, കാസിരംഗയിലെ അഗോരതോലി റേഞ്ചിന് കീഴിലുള്ള നലോനി പ്രദേശത്തുവെച്ചാണ് അവസാനശ്വാസം വലിച്ചത്. വന്യജീവി സംരക്ഷണ മേഖലയ്ക്ക് നൽകിയ അമൂല്യമായ സംഭാവനകൾ മാനിച്ച്, സംസ്കാര ചടങ്ങുകൾക്ക് മുന്നോടിയായി കാസിരംഗയിലെ വനപാലകർ ജോയ്മാലയ്ക്ക് പൂർണ്ണ ഔദ്യോഗിക ബഹുമതികളോടെ ‘ഗാർഡ് ഓഫ് ഓണർ’ നൽകി ആദരിച്ചു.
1960-ൽ ജനിച്ച ജോയ്മാല 1992-ലാണ് കാസിരംഗ നാഷണൽ പാർക്കിന്റെ വനംവകുപ്പ് സേനയുടെ ഭാഗമാകുന്നത്. തുടർന്ന് 34 വർഷക്കാലം കാസിരംഗയിലെ വന്യജീവികളെ വേട്ടക്കാരിൽ നിന്ന് സംരക്ഷിക്കുന്നതിലും വനത്തിനുള്ളിലെ സുരക്ഷാ നിരീക്ഷണങ്ങളിലും അവൾ നിർണ്ണായക പങ്കുവഹിച്ചു. കനത്ത പ്രളയസമയങ്ങളിലും വാഹനം എത്തിപ്പെടാൻ സാധിക്കാത്ത ഇടതൂർന്ന കാടുകളിലും വനപാലകർക്ക് വിശ്വസ്തയായ കൂട്ടാളിയായിരുന്നു ഈ വമ്പൻ ആന. അസമിലെ വന്യജീവി സംരക്ഷണ ചരിത്രത്തിൽ ജോയ്മാലയുടെ പേര് അന്താരാഷ്ട്ര തലത്തിൽ ശ്രദ്ധിക്കപ്പെടുന്നത് 2004-ൽ നടന്ന ഒരു അവിസ്മരണീയ സംഭവത്തോടെയാണ്. വനത്തിനുള്ളിൽ പട്രോളിംഗ് നടത്തുന്നതിനിടെ പെട്ടെന്ന് ചാടിവീണ ഒരു കടുവയെ ജോയ്മാല ധീരമായി പ്രതിരോധിക്കുകയും, ആ ധീരമായ നിമിഷം വന്യജീവി ക്യാമറയിൽ പതിയുകയും ചെയ്തു. കാസിരംഗയിലെ പട്രോളിംഗ് ആനകളുടെയും അവരുടെ പാപ്പാന്മാരുടെയും വീര്യത്തിന്റെ പ്രതീകമായി മാറിയ ഈ ചിത്രം ആഗോളതലത്തിൽ ഏറെ പ്രശസ്തമാണ്.
ജോയ്മാലയുടെ വിയോഗത്തിൽ അസം വനംവകുപ്പ് മന്ത്രി ജയന്ത മല്ലബറുവ അഗാധമായ ദുഃഖം രേഖപ്പെടുത്തുകയും, കാസിരംഗയുടെ ജൈവവൈവിധ്യം കാത്തുസൂക്ഷിക്കാൻ വനപാലകർക്കൊപ്പം നിശ്ശബ്ദമായി ത്യാഗം സഹിച്ച ഏറ്റവും മികച്ച ‘കാട്ടുപോരാളി’ എന്നാണ് അവളെ വിശേഷിപ്പിച്ചത്. തന്റെ ഔദ്യോഗിക ജീവിതത്തിലുടനീളം കാസിരംഗയുടെ കാവലാളായി ജീവിച്ച ജോയ്മാലയുടെ പാരമ്പര്യം അവിടെ അവസാനിക്കുന്നില്ല. അവളുടെ മക്കളും പേരമക്കളും ഉൾപ്പെടുന്ന തലമുറ നിലവിൽ കാസിരംഗയിൽ പട്രോളിംഗ് ആനകളായി വന്യജീവി സംരക്ഷണ ദൗത്യം തുടർന്നുപോരുന്നുണ്ട്. വന്യജീവി സ്നേഹികളുടെ മനസ്സിൽ ധീരതയുടെയും വിശ്വസ്തതയുടെയും പ്രതീകമായി ജോയ്മാലയുടെ ഓർമ്മകൾ എക്കാലവും നിലനിൽക്കും.
