നെറ്റ്ഫ്ലികസിലെ ഹിറ്റ് സീരിസ് ഫൌദ നാലാം ഭാഗം ഉടൻ പുറത്തിറങ്ങുന്നു. ജനുവരി 20ന് ഫൌദ നാലാം ഭാഗം നെറ്റ്ഫ്ലിക്സ് റിലീസ് ചെയ്യുമെന്നാണ് റിപ്പോർട്ട്. ഇസ്രായേൽ പാലസ്തീൻ സംഘർഷത്തിൻറെ യാഥാർത്ഥ്യം ഒട്ടും ചോരാതെ വരച്ചുകാട്ടുന്ന പരമ്പരയാണ് ഫൌദ. ഇസ്രായേൽ പ്രതിരോധ സേനയിലെ തങ്ങളുടെ അനുഭവങ്ങളുടെ കരുത്തിൽ ലിയോർ റാസും അവി ഇസച്ചറോഫും ആണ് ഫൌദയ്ക്ക് തിരക്കഥ എഴുതിയത്.
മിസ്താർവിം യൂണിറ്റിലെ കമാൻഡറായ ഡോറണിന്റെയും അദ്ദേഹത്തിന്റെ ടീമംഗങ്ങളുടെയും കഥയാണ് ഫൌദയിൽ നിറഞ്ഞു നിൽക്കുന്നത്. പരമ്പരയിലെ പ്രധാന കഥാപാത്രമായ ഡോറണിനെ അവതരിപ്പിച്ചതും ലിയോർ റാസ് ആണ്. ഇസ്രായേൽ പ്രതിരോധസേനയിലെ തൻറെ അനുഭവവെളിച്ചങ്ങൾ ഫൌദയിലെ അഭിനയത്തിന് മുതൽകൂട്ടായെന്ന് ലിയോർ റാസ് പറയുന്നു.
2014-ലെ ഇസ്രായേൽ-ഗാസ സംഘർഷത്തിനിടെ കഫർ ഖാസിമിലാണ് ആദ്യ സീസൺ ചിത്രീകരിച്ചത് . 2015 ഫെബ്രുവരി 15-ന് ആദ്യ ഭാഗം പുറത്തിറക്കി. രണ്ടാം സീസൺ 2017 ഡിസംബർ 31-ന് പ്രദർശിപ്പിച്ചു. ഗാസ മുനമ്പിൽ ചിത്രീകരിച്ച മൂന്നാം സീസൺ 2019-ലും 2020-ലും സംപ്രേഷണം ചെയ്തു.
ലിയോർ റാസ് (ഡോറൺ കാവില്ലിയോ), ഹിഷാം സുല്ലിമാൻ (അബു അഹമ്മദ്), , ഷാദി മാരി (വാലിദ് അൽ ആബേദ്), ലാറ്റിഷ്യ എഡോ (ഡോ.ഷിറിൻ) , സാച്ചി ഹാലേവി (നാർ), ഇറ്റ്സിക് കോഹൻ (ക്യാപ്റ്റ്യൻ അയൂബ്, ഗാലി), റോണ ലീ ഷീമോൺ (നുരിറ്റ്) എന്നിവരാണ് പ്രധാന കഥാപാത്രങ്ങളെ അവതരിപ്പിച്ചത്.
റഷ്യയുടെയും ഉക്രൈൻറെ ചില പ്രദേശങ്ങളിൽ വെച്ചാണ് നാലാം ഭാഗത്തിൻറെ ചിത്രീകരണം നടന്നത്. എന്നാൽ സംഘർഷം വർദ്ധിച്ചതോടെ ചിത്രീകരണം ഇവിടെ നിന്ന് മാറ്റേണ്ടി വന്നു. ഇതാണ് പുതിയ എപ്പിസോഡിൻറെ റിലീസിങ്ങ് വൈകിയതെന്ന് അണിയറ പ്രവർത്തകർ പറയുന്നു.
2016ലെ ഇസ്രായേലി അക്കാദമി അവാർഡുകളിൽ മികച്ച ടിവി പരമ്പരയ്ക്ക് ഉൾപ്പെടെ ആറ് അവാർഡുകളാണ് ഫൌദ നേടിയത് . ന്യൂയോർക്ക് ടൈംസ് 2017 ലെ ഏറ്റവും മികച്ച അന്താരാഷ്ട്ര സീരിസുകളായി ഒന്നായി ഫൌദയെ തിരഞ്ഞെടുത്തു. 2018-ൽ, മികച്ച ടിവി പരമ്പര, മികച്ച നടൻ (ലിയോർ റാസ്) , മികച്ച തിരക്കഥ എന്നിവയുൾപ്പെടെ 11 ഇസ്രായേലി ടിവി അക്കാദമി അവാർഡുകളും ഫൌദ നേടിയെടുത്തു.
Discussion about this post