അഗർത്തല: പൊതുജന ക്ഷേമത്തിനുള്ള പ്രഖ്യാപനങ്ങളുമായി ത്രിപുരയിൽ ബിജെപിയുടെ തിരഞ്ഞെടുപ്പ് പ്രകടന പതിക്ര. ബിജെപി ദേശീയ അദ്ധ്യക്ഷൻ ജെ.പി നദ്ദയും മുഖ്യമന്ത്രിയും ബിജെപി നേതാവുമായ മാണിക് സാഹയും ചേർന്നാണ് പ്രകടന പത്രിക പുറത്തിറക്കിയത്. സംസ്ഥാനത്തിന്റെ അടിസ്ഥാന സൗകര്യ വികസനത്തിനും ജനങ്ങളുടെ ക്ഷേമത്തിനും ഊന്നൽ നൽകിക്കൊണ്ടുള്ള പ്രഖ്യാപനങ്ങളാണ് പ്രകടന പത്രികയിൽ ഉള്ളത്.
പ്രകടന പത്രിക ജനങ്ങളോട് ബിജെപിയ്ക്കുള്ള കരുതലാണ് വ്യക്തമാക്കുന്നത് എന്ന് നദ്ദ പറഞ്ഞു. തങ്ങളുടെ കയ്യിലിരിക്കുന്നത് കേവലം ഒരു കഷ്ണം പേപ്പർ അല്ല. ജനങ്ങളോട് തങ്ങൾക്കുള്ള കരുതലാണ്. ഒരു കാലത്ത് ത്രിപുര കലാപത്തിന്റെയും സംഘർഷങ്ങളുടെയും പേരിൽ മാത്രം അറിയപ്പെട്ടിരുന്ന സംസ്ഥാനമാണ്. എന്നാൽ ഇന്ന് ത്രിപുര അറിയപ്പെടുന്നത് സമാധാനത്തിന്റെയും വികസനത്തിന്റെയും സംസ്ഥാനമായാണ്. സംസ്ഥാനത്ത് ഇതുവരെ 13 ലക്ഷം ആയുഷ്മാൻ ഭാരത് കാർഡാണ് നൽകിയതെന്നും അദ്ദേഹം വ്യക്തമാക്കി.
മാതാ സുന്ദരി ക്ഷേത്രത്തിൽ ദർശനം നടത്തിയതിന് ശേഷമായിരുന്നു നദ്ദയും മാണിക് സാഹയും ബിജെപിയുടെ ചടങ്ങിൽ പങ്കെടുക്കാൻ എത്തിയത്. ഇതേക്കുറിച്ചും നദ്ദ പരിപാടിയിൽ പരാമർശിച്ചു. ഇവിടേയ്ക്ക് വരുന്നതിന് മുൻപ് മാതാ സുന്ദരി ക്ഷേത്രത്തിൽ ദർശനം നടത്തിയിരുന്നു. ഇവിടേയ്ക്ക് വരുമ്പോഴെല്ലാം പ്രത്യേക ഊർജ്ജമാണ് തനിക്ക് ലഭിക്കുക. എല്ലാവർക്കുമൊപ്പം, എല്ലാവരുടെയും വികസനം എന്ന ലക്ഷ്യത്തിലൂന്നിയുള്ള പ്രധാനമന്ത്രി നരേന്ദ്ര മോദിയുടെ പ്രവർത്തനങ്ങൾ സമൂഹത്തെ മുന്നോട്ട് നയിക്കുകയാണെന്നും നദ്ദ കൂട്ടിച്ചേർത്തു.
Discussion about this post