അബുദാബി: ചരിത്രമാകാന്‍ പോകുന്ന യുഎഇയിലെ ആദ്യത്തെ കൊത്തുപണികളോട് കൂടിയ ബാപ്‌സ് ഹിന്ദു മന്ദിരത്തിന്റെ നിര്‍മ്മാണം അബുദാബിയിലെ അബു മുറൈഖ മേഖലയില്‍ തകൃതിയായി നടക്കുകയാണ്. നിലവില്‍ വെളുത്ത മാര്‍ബിള്‍ ശിലകളിലെ കൊത്തുപണിയാണ് നടക്കുന്നത്. നിര്‍മ്മാണം പാതി പിന്നിട്ട ക്ഷേത്രത്തിലെ പ്രധാന പ്രാര്‍ത്ഥന ഹാളിലേക്കുള്ള മാര്‍ബിള്‍ തൂണുകളിലാണ് കൊത്തുപണി നടക്കുന്നത്.
അടുത്ത വര്‍ഷം ഫെബ്രുവരിയില്‍ ക്ഷേത്രം ഭക്തര്‍ക്കായി തുറന്നുകൊടുക്കാനാണ് പദ്ധതി. ഇരുനിലകളിലായുള്ള ക്ഷേത്രം വാസ്തുശൈലി കൊണ്ടും കൊത്തുപണികള്‍ കൊണ്ടും വിസ്മയം തീര്‍ക്കുന്ന ക്ഷേത്രനിര്‍മ്മിതി തന്നെയാണ്. നാലുവര്‍ഷത്തെ ആഴത്തിലുള്ള ഗവേഷണമാണ് ക്ഷേത്രനിര്‍മ്മാണത്തില്‍ പ്രതിഫലിക്കുന്നത്.
പുരാതന ശില്‍പ്പങ്ങളുടെ പുനരാവിഷ്‌കാരത്തിന് സാങ്കേതികവിദ്യയും ക്ഷേത്രനിര്‍മ്മാണത്തില്‍ ഉപയോഗപ്പെടുത്തിയിട്ടുണ്ട്. ഭൂചലന സാധ്യത കണ്ടെത്തുന്നതിനായി മുന്നൂറോളം സെന്‍സറുകളാണ് ഇവിടെ ഒരുക്കിയിട്ടുള്ളത്. എഞ്ചിനീയര്‍മാര്‍ക്ക് നിര്‍മ്മാണ പുരോഗതി വിലയിരുത്തുന്നതിനായി ദിവസവും പൂര്‍ത്തിയായ ജോലികളുടെയും നിര്‍മ്മിച്ച പില്ലറുകളുടെയും വിശദാംശങ്ങള്‍ 3D ഡിജിറ്റല്‍ മാതൃകയിലേക്ക് കൂട്ടിച്ചേര്‍ക്കും.
വരുമാസങ്ങളില്‍ നിലവില്‍ നിര്‍മ്മിച്ചുകൊണ്ടിരിക്കുന്ന കല്‍ശില്‍പ്പങ്ങള്‍ക്ക് മുകളിലായി ഏഴ് സ്തൂപങ്ങളുടെ നിര്‍മ്മാണവും നടക്കും.
Discussion about this post