കാസര്‍ക്കോട്: തദ്ദേശ തെരഞ്ഞെടുപ്പില്‍ വോട്ട് ചെയ്യാനെത്തിയ നാല് പേര്‍ കുഴഞ്ഞുവീണ് മരിച്ചു. കാസര്‍ക്കോട്, മാഹി, കൊല്ലം എന്നിവിടങ്ങളിലാണ് വോട്ടര്‍മാര്‍ മരിച്ചത്. കാസര്‍ക്കോടില്‍ മധുര്‍ പഞ്ചായത്തിലെ ഉളിയത്തടുക്ക എല്‍.പി. സ്‌കൂളില്‍ വോട്ട് ചെയ്യാനെത്തിയ റിട്ട. വില്ലേജ് ഓഫീസര്‍ സി.സി.പത്മനാഭന്‍ നായര്‍ (59) ആണ് മരിച്ചത്.
ശ്രീകണ്ഠാപുരം കോട്ടൂര്‍ സ്വദേശിയാണ്. വോട്ട് ചെയ്യാന്‍ പോകുന്ന വഴിയില്‍ വെച്ച് ഹൃദയാഘാതം ഉണ്ടാവുകയായിരുന്നു. കോണ്‍ഗ്രസ് ഐയുടെ മധുര്‍ പഞ്ചായത്ത് പ്രസിഡന്റാണ് പത്മനാഭന്‍ നായര്‍.
ന്യൂമാഹി ഗ്രാമപഞ്ചായത്ത് ഏഴാം വാര്‍ഡിലെ പെരിങ്ങോം സ്‌കൂളില്‍ വോട്ട് ചെയ്യാനെത്തിയ പീടികവാതുക്കല്‍ അച്ചൂട്ടി (78)യാണ് കുഴഞ്ഞുവീണ് മരിച്ച മറ്റൊരാള്‍. മാങ്ങോട്ട്കാവ് ഭഗവതി ക്ഷേത്രം, കാഞ്ഞിരമുള്ളപറമ്പ് ഭഗവതി ക്ഷേത്രം, കവിയൂര്‍ ശ്രീനാരായണ മഠം എന്നിവയുടെ ഭാരവാഹിയാണ്.
കൊല്ലത്ത് വെണ്ടാര്‍ ഹൈസ്‌കൂളില്‍ വോട്ട് ചെയ്തു മടങ്ങുകയായിരുന്ന റിട്ട. ഹെഡ്മാസ്റ്റര്‍ വാസുദേവന്‍ പിള്ള (85)യാണ് കുഴഞ്ഞുവീണു മരിച്ചത്. പോളിങ്ബൂത്തില്‍ വെച്ച് ദേഹാസ്വാസ്ഥ്യം ഉണ്ടാവുകയായിരുന്നു.
Discussion about this post