ഗാങ്‌ടോക്ക്: സിക്കിമിൽ ഭൂചലനം. റിക്ടർസ്‌കെയിലിൽ 4.3 തീവ്രത രേഖപ്പെടുത്തിയ ഭൂചലനമാണ് ഉണ്ടായത്. സംഭവത്തിൽ ആളപായമോ നാശനഷ്ടമോ ഉണ്ടായിട്ടില്ല.
യുക്‌സോമിൽ പുലർച്ചെ 4.15 ഓടെയായിരുന്നു ഭൂചലനം ഉണ്ടായത്. സെക്കന്റുകളോളം പ്രകമ്പനം നീണ്ടു നിന്നു. അപ്രതീക്ഷിതമായുണ്ട ഭൂചലനം ആളുകളിൽ പരിഭ്രാന്തിയുണ്ടാക്കി. ഭൂചലനം അനുഭവപ്പെട്ടതോടെ വീടുകളിൽ ഉറങ്ങിക്കിടന്നവർ പുറത്തേക്ക് ഓടിയതായി അധികൃതർ അറിയിച്ചു.
പ്രകമ്പനത്തിൽ വീടുകളിൽ വിള്ളൽ ഉണ്ടായിട്ടുണ്ട്. ചില വീടുകളിൽ ജനലിന്റെ ചില്ലുകളും തകർന്നു. ഭൂചലനം അനുഭവപ്പെട്ട പ്രദേശത്ത് അധികൃതർ പരിശോധന നടത്തും. ഗാങ്‌ടോക്കിന്റെ വടക്ക് പടിഞ്ഞാറ് ഭാഗത്ത് 70 കിലോ മീറ്റർ മാറി 10 കിലോ മീറ്റർ ആഴത്തിലാണ് ഭൂചലനത്തിന്റെ പ്രഭവ കേന്ദ്രമെന്നാണ് നാഷണൽ സെന്റർ ഫോർ സീസ്‌മോളജി അറിയിച്ചിട്ടുള്ളത്.
ഇന്നലെ വൈകീട്ട് അസമിലും ഭൂചലനം അനുഭവപ്പെട്ടിരുന്നു. നാഗാവിലായിരുന്നു റിക്ടർ സ്‌കെയിലിൽ 4.0 തീവ്രത രേഖപ്പെടുത്തിയ ഭൂചലനം അനുഭവപ്പെട്ടത്. തുടർച്ചയായി ഉണ്ടാകുന്ന ഭൂചലനം വലിയ ആശങ്കയാണ് ജനങ്ങളിൽ ഉണ്ടാക്കുന്നത്.
