ജാപ്പനീസ് നഗരമായ ഐച്ചി-നഗോയയിൽ ആരംഭിച്ച ഏഷ്യൻ പാരാ ഗെയിംസിന്റെ ആദ്യ ദിനത്തിൽ ഇന്ത്യ മികച്ച പ്രകടനം കാഴ്ചവെച്ചു. ഉദ്ഘാടന ദിവസം തന്നെ നാല് സ്വർണവും അഞ്ച് വെള്ളിയും രണ്ട് വെങ്കലവും ഉൾപ്പെടെ ആകെ 11 മെഡലുകളാണ് ഇന്ത്യൻ പാരാ അത്ലറ്റുകൾ സ്വന്തമാക്കിയത്. മെഡൽ പട്ടികയിൽ നിലവിൽ നാലാം സ്ഥാനത്തുള്ള ഇന്ത്യൻ സംഘം രാജ്യത്തിന് അഭിമാനകരമായ തുടക്കമാണ് ടൂർണമെന്റിൽ സമ്മാനിച്ചിരിക്കുന്നത്.
ഷൂട്ടിങ്, അത്ലറ്റിക്സ്, ജൂഡോ, നീന്തൽ തുടങ്ങിയ ഇനങ്ങളിലാണ് ഇന്ത്യൻ താരങ്ങൾ മികച്ച നേട്ടങ്ങൾ കൈവരിച്ചത്. വനിതകളുടെ 10 മീറ്റർ എയർ റൈഫിൾ ഷൂട്ടിംഗിൽ മോണ അഗർവാൾ സ്വർണം നേടിയപ്പോൾ, സഹതാരം അവനി ലേഖര വെള്ളി മെഡൽ സ്വന്തമാക്കി. അത്‌ലറ്റിക്സിൽ നിഷാദ് കുമാർ, റിങ്കു, സൗമ്യ എന്നിവരും സ്വർണമെഡലുകൾ നേടി രാജ്യത്തിന്റെ അഭിമുയർത്തി. അത്‌ലറ്റിക്സിലും ജൂഡോയിലുമായി നിരവധി താരങ്ങൾ വെള്ളി, വെങ്കല മെഡലുകളും സ്വന്തമാക്കി ഇന്ത്യൻ മെഡൽ നേട്ടം സമ്പന്നമാക്കി.
അന്താരാഷ്ട്ര വേദികളിൽ ഇന്ത്യയുടെ കായിക മികവ് ഊട്ടിയുറപ്പിക്കുന്നതാണ് പാരാ അത്ലറ്റുകളുടെ ഈ കുതിപ്പ്. വരും ദിവസങ്ങളിലും കൂടുതൽ മത്സരങ്ങൾ നടക്കാനിരിക്കെ, കൂടുതൽ മെഡലുകൾ നേടി രാജ്യത്തിന്റെ സ്ഥാനം മെച്ചപ്പെടുത്താമെന്ന പ്രതീക്ഷയിലാണ് ഇന്ത്യൻ സംഘം. താരങ്ങളുടെ ഈ തകർപ്പൻ പ്രകടനത്തിൽ പ്രധാനമന്ത്രിയും വിവിധ കായിക പ്രമുഖരും ഉൾപ്പെടെയുള്ളവർ അഭിനന്ദനങ്ങൾ അറിയിച്ചു.
