കേപ് ടൗൺ: ട്വന്റി 20 ക്രിക്കറ്റിൽ 100 വിക്കറ്റ് നേട്ടം സ്വന്തമാക്കുന്ന ആദ്യ ഇന്ത്യൻ താരമായി 25 വയസ്സുകാരിയായ ദീപ്തി ശർമ്മ. ട്വന്റി 20 ലോകകപ്പിൽ വെസ്റ്റ് ഇൻഡീസിനെതിരായ മത്സരത്തിലാണ് ദീപ്തി ഈ നേട്ടം സ്വന്തമാക്കിയത്. 100 വിക്കറ്റ് ക്ലബിന്റെ ഭാഗമാകുന്ന ആദ്യ ഇന്ത്യൻ ബൗളറാണ് ദീപ്തി.
വെസ്റ്റ് ഇൻഡീസിന്റെ അഫി ഫ്ലെച്ചറായിരുന്നു ട്വന്റി 20 ക്രിക്കറ്റിൽ ദീപ്തിയുടെ നൂറാമത്തെ ഇര. 98 വിക്കറ്റുമായി പൂനം യാദവാണ് ദീപ്തിക്ക് തൊട്ട് പിന്നിലുള്ള ഇന്ത്യൻ താരം. യുസ്വേന്ദ്ര ചാഹലാണ് പട്ടികയിൽ മുന്നിലുള്ള ഇന്ത്യൻ പുരുഷ താരം. 91 വിക്കറ്റുകളാണ് ചാഹലിന്റെ നേട്ടം.
പ്രഥമ വനിതാ പ്രീമിയർ ലീഗിൽ 2.6 കോടി ചിലവിട്ടാണ് യുപി വാറിയേഴ്സ് ദീപ്തിയെ സ്വന്തമാക്കിയിരിക്കുന്നത്. 87 ഇന്നിംഗ്സുകളിൽ നിന്നാണ് ദീപ്തി 100 വിക്കറ്റ് നേട്ടവും ഇന്ത്യൻ റെക്കോർഡും തന്റെ പേരിൽ കുറിച്ചത്. 125 വിക്കറ്റുകളുമായി വെസ്റ്റ് ഇൻഡീസ് താരം അനീസ മുഹമ്മദ് നയിക്കുന്ന പട്ടികയിൽ ഒൻപതാം സ്ഥാനത്താണ് ദീപ്തി.
വെസ്റ്റ് ഇൻഡീസിനെതിരെ ഇന്ന് നടന്ന മത്സരത്തിലും ദീപ്തിയാണ് ഇന്ത്യയുടെ മികച്ച ബൗളർ. 4 ഓവറിൽ 15 റൺസ് മാത്രം വിട്ടു കൊടുത്താണ് ദീപ്തി 3 കരീബിയൻ വിക്കറ്റുകൾ വീഴ്ത്തിയത്. മത്സരത്തിൽ 6 വിക്കറ്റിന് ഇന്ത്യ വിജയിച്ചു.
Discussion about this post