പഞ്ചാക്ഷരീ മന്ത്രമുഖരിതമായ അന്തരീക്ഷത്തിൽ ശിവരാത്രി വ്രതമെടുക്കാൻ ഒരുങ്ങി ഭക്തർ. മനസും ശരിരവും ഭഗവാനിൽ അർപ്പിച്ച് കഠിനമായ വ്രതനിഷ്ഠകളോടെ ശിവരാത്രി വ്രത പുണ്യം നേടാൻ തയ്യാറെടുത്ത് ക്ഷേത്രങ്ങളിലും കാവുകളിലും പ്രാർത്ഥനാപൂർവം തയ്യാറെടുപ്പുകൾ നടത്തുകയാണ് ഭക്തജനങ്ങൾ.
ഉറക്കമൊഴിഞ്ഞ്, ഒരിക്കലോ പൂർണ ഉപവാസമോ അനുഷ്ഠിച്ച് ഈശ്വര നാമജപത്തിൽ മുഴുകിയിരിക്കുന്ന ഭക്തരിൽ പലർക്കും ഉണ്ടാകുന്ന ഒരു സംശയമാണ് ശിവരാത്രി നാളിലെ ഉറക്കമൊഴിവിന് ശേഷം അടുത്ത പകലിൽ ഉറങ്ങാമോ എന്നത്. ഇതിന് പല തരത്തിലുള്ള മറുപടികളാണ് ആചാര്യന്മാർ നൽകുന്നത്.
ശിവരാത്രിയുടെ പിറ്റേ ദിവസം രാവിലെ, ക്ഷേത്രത്തിൽ നിന്നും കൊണ്ടു വരുന്ന തീർത്ഥം പാനം ചെയ്താണ് വ്രതം അവസാനിപ്പിക്കേണ്ടത്. ഇതിന് ശേഷം ഉറക്കം ആകാം എന്നാണ് ഒരു വിഭാഗം ആചാര്യന്മാർ പറയുന്നത്. ശിവരാത്രിയുടെ പിറ്റേ പകലും ഉറങ്ങാൻ പാടില്ല എന്നത് തെറ്റിദ്ധാരണയാണ്. ഇതിന്റെ ആവശ്യമില്ല. അത് ഒരു ആചാരമല്ല. വ്രതവും ധ്യാനവും പൂജകളും ശിവരാത്രി കഴിയുന്നതോടെ അവസാനിക്കുന്ന സ്ഥിതിക്ക്, അടുത്ത പകലിൽ ഉറക്കം ആവാം എന്ന് ഇവർ പറയുന്നു.
ശിവരാത്രി നാളിൽ ഉറക്കമൊഴിയുന്നവർ പിന്നീട് അടുത്ത സന്ധ്യക്ക് ചന്ദ്രനെ ദർശിച്ച ശേഷം മാത്രമേ ഉറങ്ങാൻ പാടുള്ളൂ എന്ന് വാദിക്കുന്നവരാണ് മറുപക്ഷം. ശിവരാത്രിയുടെ പിറ്റേന്ന് എന്നല്ല, നൈഷ്ഠികനായ ഒരു ഹൈന്ദവനെ സംബന്ധിച്ച് ഒരു ദിവസവും സൂര്യോദയത്തിനും അസ്തമയത്തിനും ഇടയിലുള്ള പകൽ സമയത്ത് ഉറക്കം പാടില്ലെന്നാണ് ഇവരുടെ പക്ഷം. പകലുറക്കം പാപമാണെന്ന് ഇവർ വിശ്വസിക്കുന്നു.
എന്നാൽ ഭക്തജനങ്ങൾക്കിടയിൽ ശിവരാത്രിക്ക് ശേഷമുള്ള പകലിൽ ഉറങ്ങുന്നവരും ഉറങ്ങാതെ ഇരിക്കുന്നവരും ഉണ്ട്. മന്ത്രദീക്ഷ നൽകുന്ന ഗുരുവിന്റെ, അഥവാ ശിവക്ഷേത്രത്തിലെ തന്ത്രിയുടെ ഉപദേശമാണ് ഇക്കാര്യത്തിൽ ഒരു ഭക്തൻ അന്തിമ കൽപ്പനയായി കാണേണ്ടത്.
Discussion about this post