ബീഹാറിലെ ജമൂയിയിൽ പ്രായപൂർത്തിയാകാത്ത വിദ്യാർത്ഥിനിയും കൂട്ടുകാരനും നേരിട്ട അതിക്രമത്തിന്റെ പശ്ചാത്തലത്തിൽ സംസ്ഥാന സർക്കാരിനെതിരെ രൂക്ഷവിമർശനവുമായി പ്രതിപക്ഷ നേതാവ് തേജസ്വി യാദവ്. ബിഹാറിൽ സ്ത്രീകൾക്കും പെൺകുട്ടികൾക്കും ഒട്ടും സുരക്ഷിതത്വമില്ലെന്ന് കുറ്റപ്പെടുത്തിയ ആർജെഡി നേതാവ്, ക്രമസമാധാന പാലനത്തിൽ പൂർണ്ണമായും പരാജയപ്പെട്ട മുഖ്യമന്ത്രി സമ്രാട്ട് ചൗധരി ഉടൻ രാജി വെക്കണമെന്ന് ആവശ്യപ്പെട്ടു. നേരത്തെ സംസ്ഥാനത്തെ സ്ത്രീസുരക്ഷയെക്കുറിച്ച് നടത്തിയ വാഗ്ദാനങ്ങളും അവകാശവാദങ്ങളും ഓർമ്മിപ്പിച്ചാണ് തേജസ്വി യാദവ് ഭരണകൂടത്തിനെതിരെ രംഗത്തുവന്നത്.
ജമൂയിയിൽ വിദ്യാർത്ഥികളെ തടഞ്ഞുനിർത്തി ഉപദ്രവിക്കുന്ന ദൃശ്യങ്ങൾ സമൂഹമാധ്യമങ്ങളിൽ പ്രചരിച്ചതോടെയാണ് സംഭവം വൻ വിവാദമായി മാറിയത്. പകലെന്നോ രാത്രിയെന്നോ വ്യത്യാസമില്ലാതെ വിദ്യാലയങ്ങളിലും പൊതുനിരത്തുകളിലും സ്ത്രീകൾക്കുനേരെയുള്ള അതിക്രമങ്ങൾ വർദ്ധിക്കുകയാണെന്ന് തേജസ്വി ആരോപിച്ചു. കുറ്റക്കാർക്കെതിരെ കർശന നടപടിയെടുക്കുന്നതിന് പകരം കേസ് ഒതുക്കിത്തീർക്കാനും വസ്തുതകൾ മൂടിവെക്കാനുമാണ് പോലീസും ഭരണകൂടവും ശ്രമിക്കുന്നതെന്നും അദ്ദേഹം ആരോപിച്ചു.
കേസിൽ പ്രധാന പ്രതിയായ നന്ദൻ യാദവ് ഉൾപ്പെടെ എല്ലാ പ്രതികളും പിടിയിലായെങ്കിലും പ്രതിപക്ഷത്തിന്റെ പ്രതിഷേധം ശക്തമായി തുടരുകയാണ്. സംഭവത്തിൽ ദേശീയ വനിതാ കമ്മീഷനും സ്വമേധയാ കേസെടുത്ത് റിപ്പോർട്ട് തേടിയിട്ടുണ്ട്. എന്നാൽ കുറ്റക്കാർ ഏത് രാഷ്ട്രീയക്കാരായാലും കർശന നിയമനടപടികൾ സ്വീകരിക്കുമെന്നും പ്രതിപക്ഷത്തിന്റെ രാഷ്ട്രീയ ആരോപണങ്ങൾക്ക് അടിസ്ഥാനമില്ലെന്നും ഭരണപക്ഷ നേതാക്കൾ മറുപടി നൽകി.
