2047-ഓടെ ഇന്ത്യയെ വികസിത രാഷ്ട്രമാക്കി മാറ്റുന്നതിനുള്ള ഭാവി പദ്ധതികൾക്ക് അന്തിമരൂപം നൽകാനായി പ്രധാനമന്ത്രി നരേന്ദ്ര മോദിയുടെ നേതൃത്വത്തിലുള്ള കേന്ദ്ര മന്ത്രിസഭയുടെ രണ്ടുദിവസത്തെ ‘ചിന്തൻ ശിവിർ’ നാളെ ആരംഭിക്കും. എല്ലാ കേന്ദ്രമന്ത്രിമാരും സ്വതന്ത്ര ചുമതലയുള്ള സഹമന്ത്രിമാരും മുതിർന്ന ഉദ്യോഗസ്ഥരും പങ്കെടുക്കുന്ന ഈ യോഗം കേന്ദ്ര സർക്കാരിന്റെ പ്രവർത്തനക്ഷമത വർദ്ധിപ്പിക്കുന്നതിനാണ് സംഘടിപ്പിച്ചിരിക്കുന്നത്. വിവിധ മന്ത്രാലയങ്ങളുടെ കഴിഞ്ഞകാല പ്രവർത്തനങ്ങളുടെ അവലോകനത്തോടൊപ്പം ഭാവിയിലേക്ക് നടപ്പിലാക്കേണ്ട സുപ്രധാന തീരുമാനങ്ങളും യോഗത്തിൽ ചർച്ച ചെയ്യും.
ഭരണനിർവ്വഹണം കൂടുതൽ ലളിതവും കാര്യക്ഷമവുമാക്കാൻ ലക്ഷ്യമിടുന്ന ഈ യോഗത്തിൽ ഓരോ മന്ത്രാലയത്തിന്റെയും നിർദ്ദിഷ്ട ലക്ഷ്യങ്ങൾ നിശ്ചയിക്കും. മുൻവർഷങ്ങളിൽ സംഘടിപ്പിച്ച ചിന്തൻ ശിവറുകളുടെ തുടർച്ചയായാണ് ഈ യോഗവും ചേരുന്നത്. യോഗത്തിൽ ഉയർന്നു വരുന്ന ആശയങ്ങളുടെ അടിസ്ഥാനത്തിൽ അടുത്ത അഞ്ച് വർഷത്തേക്കുള്ള നിർണ്ണായക പദ്ധതികളുടെ കരട് രൂപരേഖ തയ്യാറാക്കുമെന്ന് കേന്ദ്ര സർക്കാർ വൃത്തങ്ങൾ അറിയിച്ചു.
