ഇന്ത്യൻ വ്യോമസേന സംഘടിപ്പിക്കുന്ന ഏറ്റവും വലിയ ബഹുരാഷ്ട്ര വ്യോമാഭ്യാസ പ്രകടനമായ ‘തരംഗ് ശക്തി 2026’ സെപ്റ്റംബർ 26 മുതൽ ഒക്ടോബർ 12 വരെ രാജസ്ഥാനിലെ ജോധ്പൂർ വ്യോമസേനാ കേന്ദ്രത്തിൽ നടക്കും. ഈ പരിശീലനത്തിൽ നാൽപ്പതിലധികം രാജ്യങ്ങളുടെ പങ്കാളിത്തമുണ്ട്. ലോകത്തെ പ്രമുഖ ശക്തികേന്ദ്രങ്ങളുടെ അത്യാധുനിക യുദ്ധവിമാനങ്ങളും പ്രതിരോധ സംവിധാനങ്ങളും ഒന്നിച്ച് അണിനിരക്കുന്ന ഈ മെഗാ അഭ്യാസം ഏഷ്യയിലെ തന്നെ ഏറ്റവും വലിയ വ്യോമാഭ്യാസങ്ങളിൽ ഒന്നായാണ് കണക്കാക്കപ്പെടുന്നത്.
ഈ അഭ്യാസത്തിൽ അമേരിക്കയുടെഞ്ചാം തലമുറ സ്റ്റെൽത്ത് യുദ്ധവിമാനമായ എഫ്-35 ആദ്യമായി പങ്കടുക്കുന്നുവെന്നതാണ് പ്രധാന സവിശേഷത. യുഎസ് സേനയുടെ എഫ്-35 വിമാനങ്ങൾക്കൊപ്പം ഫ്രാൻസിന്റെ റഫാൽ, യുഎഇയുടെ എഫ്-16 വിമാനങ്ങളും ആകാശത്ത് കരുത്ത് കാട്ടും. ഇന്ത്യയുടെ മുൻനിര യുദ്ധവിമാനങ്ങളായ റഫാൽ, സുഖോയ്-30 എംകെഐ, തേജസ്, മിറാഷ്-2000, മിഗ്-29 എന്നിവയ്ക്കൊപ്പം മറ്റ് ഗതാഗത വിമാനങ്ങളും റീഫ്യുവലിംഗ് ടാങ്കറുകളും ഇന്ത്യൻ വ്യോമസേന ഈ പരിശീലനത്തിനായി വിന്യസിക്കുന്നുണ്ട്.
നൂതന സാങ്കേതികവിദ്യകളും പ്രതിരോധ തന്ത്രങ്ങളും പങ്കുവെക്കുന്നതിനും സഖ്യരാജ്യങ്ങളുടെ വ്യോമസേനകൾ തമ്മിലുള്ള ഏകോപനം വർദ്ധിപ്പിക്കുന്നതിനുമാണ് ഈ രാജ്യാന്തര പരിശീലനം ലക്ഷ്യമിടുന്നത്. ഇന്ത്യയുടെ തദ്ദേശീയ യുദ്ധവിമാന സാങ്കേതികവിദ്യയുടെ വളർച്ച ലോകത്തിന് മുന്നിൽ പ്രദർശിപ്പിക്കാനും തരംഗ് ശക്തി അവസരമൊരുക്കും. റഷ്യ-ഉക്രെയ്ൻ സംഘർഷങ്ങൾ ഉൾപ്പെടെയുള്ള ആഗോള സാഹചര്യങ്ങളുടെ പശ്ചാത്തലത്തിൽ, ഇന്തോ-പസഫിക് മേഖലയിൽ ശാന്തിയും സുരക്ഷിതത്വവും ഉറപ്പാക്കുന്നതിൽ ഇന്ത്യ നടത്തുന്ന നിർണ്ണായക നയതന്ത്ര നീക്കമായി ഈ വ്യോമാഭ്യാസം വിലയിരുത്തപ്പെടുന്നു.
