ന്യൂഡൽഹി: ചെങ്കോട്ട ആക്രമണകേസിലെ മുഖ്യപ്രതിയായ ലഷ്കർ ഭീകരൻ മുഹമ്മദ് ആരിഫിനെ ഉടൻ തൂക്കിലേറ്റുമെന്ന് റിപ്പോർട്ടുകൾ. നിലവിൽ തിഹാർ ജയലിലാണ് ആരിഫ്. കഴിഞ്ഞ വർഷം നവംബറിൽ വധശിക്ഷ ഉത്തരവ് പുനപരിശോധിക്കണമെന്ന് ആവശ്യപ്പെട്ട് മുഹമ്മദ് ആരിഫ് സുപ്രിംകോടതിയ്ക്ക് ഹർജി നൽകിയിരുന്നു. ഈ ഹർജി കോടതി തള്ളി. മുഹമ്മദ് ആരിഫിന് വധശിക്ഷ വിധിച്ചത്.
ഇപ്പോൾ തിഹാർ ജയിലിലാണ് ആരിഫ് .ആരിഫിനെ തൂക്കിലേറ്റാൻ മരണവാറണ്ട് ഉടൻ പുറപ്പെടുവിക്കണമെന്ന് ആവശ്യപ്പെട്ട് ജയിൽ അധികൃതർ തീസ് ഹസാരി കോടതിക്ക് കത്തെഴുതിയിട്ടുണ്ട്.ശിക്ഷ നടപ്പിലാക്കാൻ ഇനി അധികസമയെമെടുക്കില്ല എന്നാണ് ജയിൽ അധികൃതരിൽ നിന്ന് ലഭിക്കുന്ന സൂചന. ഫെബ്രുവരി 27 ന് കേസ് ലിസ്റ്റ് ചെയ്തതായാണ് വിവരം.
തന്റെ വധശിക്ഷ നീട്ടിവെക്കാനുള്ള തീരുമാനം പുനഃപരിശോധിക്കണമെന്ന് ആവശ്യപ്പെട്ടുകൊണ്ടും ആരിഫ് ഇതിനിടെ കോടതിയെ സമീപിച്ചിരുന്നു. എന്നാൽ, ആരിഫിന്റെ ഈ ഹർജിയിൽ കോടതിയിൽ നിന്ന് ഇതുവരെ തീരുമാനമൊന്നും വന്നിട്ടില്ല. മറുവശത്ത്, ജയിലിന്റെ കത്ത് പ്രകാരം നടപടികൾ ആരംഭിക്കാൻ കോടതി നിർദ്ദേശം നൽകിയാൽ ആരിഫിനെ ഉടൻ തൂക്കിലേറ്റാം. അതേസമയം ശിക്ഷയിൽ ഇളവ് ആവശ്യപ്പെട്ട് രാഷ്ട്രപതിയ്ക്ക് അപ്പീൽ നൽകാനുള്ള അവസരം ആരിഫിന് ഉണ്ട്.
22 വർഷം പഴക്കമുള്ള കേസാണിത്. 2000 ഡിസംബർ 22 ന് ഡൽഹിയിലെ ചെങ്കോട്ടയിലെ സൈനികർക്ക് നേരെ ഭീകരാക്രമണം നടന്നത്. ലഷ്കർ-ഇ-തൊയ്ബയുടെ 6 ഭീകരരാണ് ചെങ്കോട്ടയിലേക്ക് അതിക്രമിച്ച് കയറിയത്. സൈനികരുടെ ബാരക്കുകൾക്ക് നേരെ ഭീകരർ വെടിയുതിർക്കുകയായിരുന്നു.
ലൈറ്റ് ആൻഡ് സൗണ്ട് ഷോ കാണാനെന്ന വ്യാജേനയാണ് ഭീകരർ കോട്ടയ്ക്കുള്ളിൽ കടന്നത്. ഇന്ത്യൻ ആർമിയുടെ രാജ്പുത്താന റൈഫിൾസിന്റെ യൂണിറ്റ് 7 ആണ് ചെങ്കോട്ടയിൽ നിലയുറപ്പിച്ചിരുന്നത്. ആക്രമണത്തിൽ മൂന്ന് സൈനികർ വീരമൃത്യു വരിച്ചു. ആക്രമണത്തിന് ശേഷം ഭീകരരെല്ലാം പിന്നിലെ മതിൽ ചാടി രക്ഷപ്പെടുകയായിരുന്നുവെന്ന് അന്വേഷണത്തിൽ കണ്ടെത്തി. മുഹമ്മദ് ആരിഫാണ് ആക്രമണത്തിന്റെ സൂത്രധാരൻ. ആക്രമണം നടത്താനായി 29 ലക്ഷം രൂപയാണ് ഇയാൾ ഭീകരർക്ക് കൈമാറിയത്. പിന്നീട് ഡൽഹി പോലീസ് ഇയാളെ അറസ്റ്റ് ചെയ്യുകയായിരുന്നു.
