ന്യൂഡൽഹി: ഡൽഹിയിൽ ശക്തമായ ഭൂചലനം. റിക്ടർ സ്കെയിലിൽ 4.4 തീവ്രത രേഖപ്പെടുത്തിയ ഭൂചലനമാണ് ഉണ്ടായത്. സംഭവത്തിൽ ആളപായമില്ല.
ഡൽഹിയിലും ഡൽഹി എൻസിആറിലുമാണ് ഭൂചലനം അനുഭവപ്പെട്ടത്. ഉച്ചയ്ക്ക് ഒന്നരയോടെയായിരുന്നു സംഭവം. സെക്കന്റുകൾ നീണ്ടു നിന്ന പ്രകമ്പനത്തിൽ ആളുകൾ പരിഭ്രാന്തരായി. ഡൽഹിയ്ക്ക് പുറമേ നേപ്പാളിലും പ്രകമ്പനം അനുഭവപ്പെട്ടു. ജുംലയിൽ നിന്നും 69 കിലോ മീറ്റർ മാറിയാണ് ഭൂചലനം അനുഭവപ്പെട്ടത്. ഉപരിതലത്തിൽ നിന്നും 10 കിലോ മീറ്റർ താഴെയായാണ് ഭൂചലനത്തിന്റെ പ്രഭവ കേന്ദ്രമെന്ന് നാഷണൽ സെന്റർ ഫോർ സീസ്മോളജി വ്യക്തമാക്കി.
നേപ്പാളിൽ ഉണ്ടായ ഭൂചലനത്തിന്റെ ഭാഗമായുള്ള പ്രകമ്പനമാണ് ഡൽഹിയിൽ അനുഭവപ്പെട്ടത് എന്നാണ് സൂചന. സംഭവത്തിൽ ചില വീടുകൾക്കും കെട്ടിടങ്ങൾക്കും നേരിയ കേടുപാടുകൾ സംഭവിച്ചിട്ടുണ്ട്. ഭൂചലനം അനുഭവപ്പെട്ട പ്രദേശത്തെ സ്ഥിതിഗതികൾ വിദഗ്ധർ വിലയിരുത്തുകയാണ്.
അതേസമയം കഴിഞ്ഞ മാസവും നേപ്പാളിൽ ഭൂചലനം അനുഭവപ്പെട്ടിരുന്നു. റിക്ടർ സ്കെയിലിൽ 5.8 തീവ്രത രേഖപ്പെടുത്തിയ ഭൂചലനത്തിൽ നേരിയ നാശനഷ്ടങ്ങൾ ഉണ്ടായിരുന്നു. ഇതിനിടെ വീണ്ടും ഉണ്ടായ ഭൂചലനം ആളുകളിൽ ആശങ്കയുണ്ടാക്കുന്നുണ്ട്.
Discussion about this post