ട്വന്റി-20 ക്രിക്കറ്റിൽ ഫ്ലാറ്റ് പിച്ചുകളും ചെറിയ ബൗണ്ടറികളും കാരണം ബൗളർമാർ കടുത്ത വെല്ലുവിളി നേരിടുന്ന പശ്ചാത്തലത്തിൽ, ഇടവേളകളിൽ ആശ്വാസമേകാൻ ‘ബേബി ഓവർ’ നിയമം അന്താരാഷ്ട്ര തലത്തിൽ കൊണ്ടുവരണമെന്ന് മുൻ ഇന്ത്യൻ താരം ഹനുമ വിഹാരി. വെസ്റ്റ് ഇൻഡീസിനെതിരായ നാലാം ട്വന്റി-20യിൽ ഇന്ത്യ 247 റൺസ് വഴങ്ങി തോൽവി വഴങ്ങിയതിന് പിന്നാലെയാണ് വിഹാരിയുടെ പ്രതികരണം.
തെരുവ് ക്രിക്കറ്റിൽ (ഗല്ലി ക്രിക്കറ്റ്) മൂന്ന് പന്തുകൾ വീതം എറിയുന്ന ബേബി ഓവർ മാതൃക അന്താരാഷ്ട്ര ക്രിക്കറ്റിലും പരീക്ഷിക്കാവുന്നതാണെന്ന് താരം അഭിപ്രായപ്പെട്ടു. തുടർച്ചയായി ആറ് പന്തുകൾ എറിയുമ്പോൾ അത് ബൗളർമാർക്ക് വലിയ സമ്മർദ്ദമുണ്ടാക്കുന്നുണ്ടെന്നും, മൂന്ന് പന്തുകൾക്ക് ശേഷം ബൗളറെ മാറ്റാൻ ക്യാപ്റ്റന് അവസരം നൽകിയാൽ ബൗളർമാർക്ക് അത് വലിയ ആശ്വാസമാകുമെന്നും വിഹാരി ചൂണ്ടിക്കാട്ടി.
ട്വന്റി-20 മത്സരങ്ങളിൽ 200-ന് മുകളിൽ റൺസ് നേടുന്നത് സാധാരണ സംഭവമായി മാറിക്കഴിഞ്ഞെന്നും ഇത്തരത്തിൽ ബാറ്റർമാർക്ക് മാത്രം മുൻതൂക്കം ലഭിക്കുന്നത് ക്രിക്കറ്റിന്റെ ഭാവിക്ക് നല്ലതാണോ എന്ന് ചിന്തിക്കണമെന്നും താരം പറഞ്ഞു. മുൻപ് 160 റൺസ് വിജയകരമായി പ്രതിരോധിച്ചിരുന്ന സ്ഥാനത്ത് ഇന്ന് 240 റൺസ് പോലും സുരക്ഷിതമല്ലെന്ന സ്ഥിതിയാണുള്ളത്. ബോളിങ് നിലവാരം കുറഞ്ഞതാണോ അതോ പിച്ച് പൂർണ്ണമായും ബാറ്റിങ്ങിനെ പിന്തുണയ്ക്കുന്നതാണോ ഇതിന് കാരണമെന്ന് പരിശോധിക്കണം.
പിച്ചിൽ നിന്നും യാതൊരു ആനുകൂല്യവും ലഭിക്കാത്ത സാഹചര്യത്തിൽ ബൗളർമാർക്ക് അല്പം ഇളവുകൾ നൽകേണ്ടതുണ്ട്. ഇതിനായി പവർപ്ലേ ആറ് ഓവറിൽ നിന്ന് നാല് ഓവറാക്കി ചുരുക്കുകയോ ബേബി ഓവർ നിയമം നടപ്പിലാക്കുകയോ ചെയ്യാവുന്നതാണെന്നും അദ്ദേഹം കൂട്ടിച്ചേർത്തു. ഹൈദരാബാദിലെ തോൽവിയോടെ വിൻഡീസിനെതിരായ പരമ്പര 2-2 എന്ന നിലയിലായതോടെ ശനിയാഴ്ച ബാംഗ്ലൂരിൽ നടക്കുന്ന അഞ്ചാം മത്സരം ഇരുടീമുകൾക്കും നിർണ്ണായകമാകും.
