മുംബൈ : ക്രിക്കറ്റ് ഇതിഹാസം സച്ചിൻ ടെണ്ടുൽക്കറിന്റെ പ്രതിമ മുംബൈയിലെ വാങ്കഡെ സ്റ്റേഡിയത്തിൽ സ്ഥാപിക്കാനൊരുങ്ങുന്നു. ക്രിക്കറ്റിന് അദ്ദേഹം നൽകിയ സംഭാവനകൾക്കുള്ള ആദരവ് എന്ന നിലയിലാണ് പ്രതിമ പണിയുന്നത്. മുംബൈ ക്രിക്കറ്റ് അസോസിയേഷൻ(എംസിഎ) പ്രസിഡന്റ് അമോൽ കാലെയാണ് ഇക്കാര്യം അറിയിച്ചത്. പ്രതിമ ഉയരുന്നതോടെ രാജ്യത്ത് ഇത്തരത്തിലുള്ള ബഹുമതി ലഭിക്കുന്ന ആദ്യ കളിക്കാൻ കൂടിയാകും സച്ചിൻ.
സച്ചിന്റെ അമ്പതാം പിറന്നാൾ ദിനമായ ഏപ്രിൽ 30നാകും പ്രതിമ അനാഛാദനം ചെയ്യുകയെന്നാണ് പുറത്തുവരുന്ന റിപ്പോർട്ടുകൾ. എംസിഎ ലോഞ്ചിന് പുറത്തെ പ്ലാറ്റ്ഫോമിലാണ് ഇത് സ്ഥാപിക്കുക. എംസിഎ മാസ്റ്റർ ബ്ലാസ്റ്ററിന്റെ സുവർണ ജൂബിലി വർഷം വാങ്കഡെയിൽ ആഘോഷിക്കുന്നതിന്റെ ഭാഗമായാണ് പ്രതിമ ഉദ്ഘാടനം ചെയ്യുക. ഇതിന് സച്ചിനിൽ നിന്ന് അനുമതി വാങ്ങിക്കഴിഞ്ഞതായും അമോൽ കാലെ പറഞ്ഞു.
2013 ൽ ഇന്ത്യയ്ക്കായി സച്ചിൻ തന്റെ അവസാന മത്സരം കളിച്ച സ്റ്റേഡിയം കൂടിയാണ് മുംബൈയിലെ വാങ്കഡെ സ്റ്റേഡിയം. ‘ഭാരതരത്ന ജേതാവ് സച്ചിൻ ടെണ്ടുൽക്കർ. അദ്ദേഹം ക്രിക്കറ്റിന് നൽകിയ സംഭാവനകളെപ്പറ്റി എല്ലാവർക്കുമറിയാം. അദ്ദേഹത്തിന്റെ അമ്പതാം പിറന്നാൾ ആഘോഷ വേളയിൽ മുംബൈ ക്രിക്കറ്റ് അസോസിയേഷന്റെ ഭാഗമായി ഒരു ചെറിയ സമ്മാനം. അതാണ് പ്രതിമ അനാഛാദനത്തിലൂടെ ഉദ്ദേശിക്കുന്നത്’ അമോൽ പറഞ്ഞു.
‘എന്നെ സംബന്ധിച്ചിടത്തോളം ഈ തീരുമാനം സന്തോഷകരമായ ഒന്നാണ് എന്നാണ് സച്ചിൻ പറഞ്ഞത്. 1998-ൽ വാങ്കഡെയിൽ നിന്നാണ് ഈ യാത്ര ആരംഭിച്ചത്. ഇവിടെയാണ് ഞാൻ ആദ്യ രഞ്ജി മത്സരത്തിൽ പങ്കെടുത്തത്്. വർഷങ്ങൾക്ക് മുൻപ് അച്രേക്കർ സാർ എന്നെ ഇവിടെ വച്ച് ശാസിച്ചു. അന്ന് മുതൽ ഞാൻ ക്രിക്കറ്റിൽ കൂടുതൽ സീരിയസായി. ഈ വേദിയിലാണ് ഞാൻ അവസാന മത്സരവും കളിച്ചത്. ഈ സ്ഥലത്തെക്കുറിച്ച് എനിക്ക് നിരവധി ഓർമ്മകളുണ്ട്. ചിലത് അവിസ്മരണീയമാണ്, എന്നാൽ ചിലത് അത്ര നല്ലതല്ല” സച്ചിൻ പറഞ്ഞു.
”25 വർഷത്തെ പ്രവൃത്തി പരിചയമുള്ള 25 കാരനാണ് ഞാനെന്ന് സ്വയം പറയാറുണ്ട്. ഇത്രയും ഈ മികച്ച ബഹുമതി നൽകുന്നതിന് എംസിഎയോട് നന്ദി പറയാൻ ആഗ്രഹിക്കുന്നു. എന്റെ കരിയറിൽ ഒരുപാട് കാര്യങ്ങൾ സംഭവിച്ച, ഒരുപാട് കാര്യങ്ങൾ മാറ്റിമറിച്ച സ്ഥലമാണിത്.” താരം വ്യക്തമാക്കി.
ഇന്ത്യയിൽ മൂന്ന് സ്റ്റേഡിയങ്ങളിലാണ് ഇത്തരത്തിൽ പൂർണ്ണകായ പ്രതിമകൾ സ്ഥാപിച്ചിരിക്കുന്നത്. മുൻ ഇന്ത്യൻ സ്കിപ്പർ സികെ നായിഡുവിന്റെ പ്രതിമ നാഗ്പൂരിലെ വിദർഭ ക്രിക്കറ്റ് അസോസിയേഷൻ സ്റ്റേഡിയത്തിലും, ആന്ധ്രയിലെ വിഡിസിഎ സ്റ്റേഡിയത്തിലും ഇൻഡോറിലെ ഹോൾക്കർ സ്റ്റേഡിയത്തിലും സ്ഥാപിച്ചിട്ടുണ്ട്.
വാങ്കഡെ സ്റ്റേഡിയത്തിൽ സച്ചിന്റെ പേരിൽ ഒരു സ്റ്റാൻഡ് സ്ഥിതി ചെയ്യുന്നുണ്ട്. കൂടാതെ മുൻ ഇന്ത്യൻ ക്രിക്കറ്റ് ടീം ക്യാപ്റ്റൻ സുനിൽ ഗവാസ്കറിന്റെ പേരിൽ ഒരു കോർപ്പറേറ്റ് ബോക്സും സ്ഥാപിച്ചിട്ടുണ്ട്. മുൻ ക്യാപ്റ്റൻ ദിലിപ് വേങ്ക്സർകാരിന്റെ പേരിലൊര് സ്റ്റാൻഡും ഇവിടെയുണ്ട്.
Discussion about this post