ന്യൂയോർക്ക്: അമേരിക്കൻ നിരീക്ഷണ ഡ്രോണിനെ റഷ്യൻ യുദ്ധവിമാനം ഇടിച്ച് വീഴ്ത്തി. അമേരിക്കൻ സൈന്യമാണ് ഇക്കാര്യം അറിയിച്ചത്. ഇടിയുടെ ആഘാതത്തിൽ ഡ്രോൺ പൂർണമായും തകർന്ന് പോയതായി സൈന്യം അറിയിച്ചു.
കരിങ്കടലിൽ ചൊവ്വാഴ്ചയായിരുന്നു സംഭവം. അമേരിക്കയുടെ എംക്യു-9 ഡ്രോൺ ആണ് തകർന്നത്. കരിങ്കടലിന് മുകളിലെ വ്യോമാതിർത്തിയിലൂടെ നിരീക്ഷണം നടത്തുകയായിരുന്നു ഡ്രോൺ. ഇതിനിടെ അതിർത്തി ലംഘിച്ച് എത്തിയ റഷ്യയുടെ എസ്യു- 27 യുദ്ധ വിമാനം ഡ്രോണിനെ തടഞ്ഞ് നിർത്തിയ ശേഷം ഇടിച്ച് വീഴ്ത്തുകയായിരുന്നു. ഇടികൊണ്ടയുടൻ ഡ്രോൺ തകർന്ന് നിലത്ത് വീണു.
സംഭവത്തിൽ ശക്തമായ പ്രതിഷേധവുമായി അമേരിക്ക രംഗത്ത് എത്തി. റഷ്യയുടെ ഈ നിരുത്തരവാദ പരമായ നടപടി അപലപനീയമാണെന്ന് അമേരിക്കൻ സൈന്യം പ്രതികരിച്ചു. പ്രദേശത്ത് റഷ്യയും നിരീക്ഷണം നടത്താറുണ്ട്. എന്നാൽ ഇത് അശ്രദ്ധയാണ്. ഇതേ തുടർന്ന് ഇരു കൂട്ടർക്കും നഷ്ടമുണ്ടായെന്നും അമേരിക്കൻ സൈന്യം വ്യക്തമാക്കി. അതേസമയം ഡ്രോണിൽ ഇടിച്ച് റഷ്യൻ വിമാനവും തകർന്നുവെന്നാണ് റിപ്പോർട്ടുകൾ.
