എറണാകുളം: സർവ്വകാല റെക്കോർഡിലെത്തിയതിന് പിന്നാലെ മാറി മറിഞ്ഞ് സ്വർണ വില. തിങ്കളാഴ്ച സ്വർണം പവന് 80 രൂപ കുറഞ്ഞു. നിലവിൽ സ്വർണം പവന് 43,800 രൂപ എന്ന നിരക്കിലാണ് വ്യാപാരം പുരോഗമിക്കുന്നത്.
സ്വർണം ഗ്രാമിന് 10 രൂപയുടെ കുറവാണ് ഇന്ന് ഉണ്ടായത്. ഇതോടെ ഒരു ഗ്രാം സ്വർണത്തിന് വിപണിയിൽ വില 5,475 രൂപയായി. കഴിഞ്ഞ രണ്ട് ദിവസം സ്വർണ വിലയിൽ മാറ്റം ഉണ്ടായില്ല. ഇതിന് പിന്നാലെയാണ് ഇപ്പോൾ വില കുറഞ്ഞിരിക്കുന്നത്. അതേസമയം വില കുറഞ്ഞെങ്കിലും ആശ്വസിക്കാനുള്ള വകയില്ലെന്നാണ് ഉപഭോക്താക്കൾ പറയുന്നത്.
മാർച്ച് തുടക്കത്തിൽ 40,720 രൂപയായിരുന്നു ഒരു പവൻ സ്വർണത്തിന്റെ വില. ഇതിന് ശേഷമുള്ള ദിവസങ്ങളിൽ നേരിയ വില വ്യത്യാസങ്ങൾ മാത്രമാണ് വിലയിൽ ഉണ്ടായിരുന്നത്. എന്നാൽ 18, 19 തിയതികളിൽ 44,240 രൂപയിലേക്ക് സ്വർണവിലയെത്തി. ഇതിൽ നിന്നാണ് ഇപ്പോൾ നേരിയ കുറവുണ്ടായിരിക്കുന്നത്. അടുത്ത ദിവസം ഇതേ വില ഉയർന്നേക്കാമെന്നാണ് കരുതുന്നത്.
യുഎസ ബാങ്ക് പ്രതിസന്ധിയാണ് നിലവിൽ സ്വർണം റെക്കോർഡ് വിലയിലേക്ക് ഉയരാൻ കാരണം എന്നാണ് സാമ്പത്തിക വിദഗ്ധർ പറയുന്നത്. ബാങ്ക് പ്രതിസന്ധി നേരിട്ടതോടെ നിക്ഷേപകർ സ്വർണത്തിലേക്ക് തിരിഞ്ഞു. ഇതാണ് പെട്ടെന്നുണ്ടായ വിലവർദ്ധനവിന് കാരണം.
Discussion about this post