കേന്ദ്ര ആഭ്യന്തര മന്ത്രി അമിത് ഷായുടെ കേരള സന്ദർശനത്തിനിടെയുണ്ടായ കരിങ്കൊടി പ്രതിഷേധവും അതിനെത്തുടർന്ന് സംസ്ഥാനത്ത് ബിജെപിയും യുവമോർച്ചയും നടത്തുന്ന പ്രതിഷേധങ്ങളും രാഷ്ട്രീയ സംഘർഷങ്ങളും കത്തുന്നു. കൊല്ലത്ത് അമിത് ഷായുടെ വാഹനവ്യൂഹം തടയാൻ യൂത്ത് കോൺഗ്രസ് ശ്രമിച്ചത് സർക്കാരിന്റെ ഒത്താശയോടെയാണെന്നും സംഭവത്തിൽ ഗുരുതരമായ സുരക്ഷാ വീഴ്ചയും ഇന്റലിജൻസ് പരാജയവുമാണ് ഉണ്ടായതെന്നും ബിജെപി ദേശീയ സെക്രട്ടറി കെ. സുരേന്ദ്രൻ ആരോപിച്ചു.
പൊലീസിന്റെ ഭാഗത്തുനിന്ന് വീഴ്ചയൊന്നും ഉണ്ടായിട്ടില്ലെന്ന വാദം പൊള്ളയാണെന്നും, പ്രതിഷേധത്തിന്റെ വീഡിയോ സമൂഹമാധ്യമങ്ങളിൽ നിന്ന് നീക്കം ചെയ്യാൻ മന്ത്രി ഒ.ജെ. ജനീഷിന് മുഖ്യമന്ത്രി നിർദ്ദേശം നൽകിയിരുന്നുവെന്നും അദ്ദേഹം വാർത്താസമ്മേളനത്തിൽ കുറ്റപ്പെടുത്തി. അമിത് ഷായ്ക്കെതിരായ പ്രതിഷേധത്തിന് പിന്നാലെ സംസ്ഥാനത്ത് മന്ത്രിമാർക്കും കോൺഗ്രസ് നേതാക്കൾക്കുമെതിരെ യുവമോർച്ചയും കരിങ്കൊടി പ്രതിഷേധം ശക്തമാക്കിയിട്ടുണ്ട്. മുഖ്യമന്ത്രി വി.ഡി. സതീശൻ, ആഭ്യന്തര മന്ത്രി രമേശ് ചെന്നിത്തല, പ്രിയങ്ക ഗാന്ധി എന്നിവർക്ക് പുറമെ മന്ത്രി ഒ.ജെ. ജനീഷിന്റെ വാഹനം തടഞ്ഞും യുവമോർച്ച പ്രവർത്തകർ പ്രതിഷേധം കടിപ്പിച്ചു.
അമിത് ഷായെ തടഞ്ഞതിൽ കേസില്ലെങ്കിൽ ഇവിടുത്തെ മന്ത്രിമാരെയും തടയുമെന്ന് മുന്നറിയിപ്പ് നൽകിയ കെ. സുരേന്ദ്രൻ, യുവമോർച്ചക്കാരുടെ ശരീരത്തിലൂടെ ഒഴുകുന്നതും രക്തമാണെന്നും വ്യക്തമാക്കി. സംഭവത്തിൽ ഉന്നതതല അന്വേഷണം നടത്തിയില്ലെങ്കിൽ ശക്തമായ പ്രത്യാഘാതം നേരിടേണ്ടി വരുമെന്ന് ബിജെപി മുന്നറിയിപ്പ് നൽകുന്നു.
