രണ്ടാഴ്ച മുൻപ് അമൃത്പാലിനൊപ്പം രക്ഷപെട്ട ഡ്രൈവർ അറസ്റ്റിൽ; വിഘടനവാദി നേതാവിനായി തിരച്ചിൽ തുടർന്ന് പോലീസ്

അമൃത്സർ: വിഘടവവാദിയായ അമൃത്പാൽ സിംഗിന്റെ അടുത്ത അനുയായിയായ ജോഗ സിംഗിനെ അറസ്റ്റ് ചെയ്ത് പഞ്ചാബ് പോലീസ്. രണ്ടാഴ്ച മുൻപ് അമൃത്പാൽ സിംഗിനൊപ്പമാണ് ഇയാളും പോലീസിനെ വെട്ടിച്ച് മുങ്ങിയത്. ലുധിയാനയ്ക്ക് സമീപമുള്ള സോനേവാളിൽ വച്ചാണ് ജോഗ സിംഗിനെ പിടികൂടിയത്. പോലീസ് നടപടി ആരംഭിച്ചതിന് പിന്നാലെയാണ് അമൃത്പാൽ സിംഗ് കൂട്ടാളികളായ ജോഗ സിംഗ്, പപ്പൽപ്രീത് എന്നിവർ പോലീസിനെ കബളിപ്പിച്ച് രക്ഷപെടുന്നത്.

അമൃത്പാലിന്റെ ഡ്രൈവർ കൂടിയാണ് ജോഗ സിംഗ്. ഇയാളുടെ ഫോൺ സിഗ്നലുകൾ പരിശോധിച്ചാണ് പോലീസ് ട്രാക്ക് ചെയ്തത്. അതേസമയം ജോഗ സിംഗിനെ പിടികൂടുന്ന സമയത്ത് ഇയാൾ തനിച്ചായിരുന്നുവെന്നാണ് പോലീസ് പറയുന്നത്. അമൃത്പാൽ ജോഗ സിംഗിനൊപ്പം ഉണ്ടാകുമെന്ന നിഗമനത്തിലായിരുന്നു പോലീസ്. കഴിഞ്ഞ 14 ദിവസമായി അമൃത്പാലിന് വേണ്ടിയുള്ള തിരച്ചിൽ പോലീസ് തുടരുകയാണ്.

ഇതിനിടെ രണ്ട് വീഡിയോകളും അമൃത്പാൽ പുറത്ത് വിട്ടിട്ടുണ്ട്. താൻ തീഴടങ്ങില്ലെന്നും, പൊതുജനമദ്ധ്യത്തിൽ ഉടനെ എത്തുമെന്നുമാണ് ഇന്നലെ പുറത്ത് വിട്ട വീഡിയോ സന്ദേശത്തിൽ അമൃത്പാൽ പറയുന്നത്. അറസ്റ്റ് ഭയക്കുന്നില്ലെന്നും, രാജ്യം വിടില്ലെന്നും അമൃത്പാൽ വീഡിയോയിൽ പറയുന്നുണ്ട്. അമൃത്പാൽ കീഴടങ്ങുമെന്ന സൂചനകളെ തുടർന്ന് സുവർണ ക്ഷേത്രത്തിലും വലിയ സുരക്ഷയാണ് ഒരുക്കിയിരുന്നത്. അതേസമയം അറസ്റ്റിലായ ഒരാളെ മോചിപ്പിക്കണമെന്ന് ആവശ്യപ്പെട്ട് അമൃത്പാലിന്റെ അനുയായികൾ അമൃത്സറിനടുത്തുള്ള അജ്നാല പോലീസ് സ്റ്റേഷൻ അടിച്ചുതകർത്തു. സിഖ് സംഘടനകളുടെ ആവശ്യം പരിഗണിച്ച് അമൃത്പാലിനൊപ്പം ഉണ്ടായിരുന്നവരെ ഇന്നലെ പോലീസ് വിട്ടയച്ചു. 360ൽ 348 പേരെയാണ് വിട്ടയച്ചത്.