മുംബൈ: ഐപിഎല്ലിലെ ക്ലാസിക് പോരാട്ടം എന്ന് വിശേഷിപ്പിക്കപ്പെടുന്ന മുംബൈ- ചെന്നൈ ഏറ്റുമുട്ടലിൽ, മുംബൈ ഇന്ത്യൻസിനെ വാംഖഡെയിൽ സച്ചിനെ സാക്ഷിയാക്കി തകർത്തെറിഞ്ഞ് ചെന്നൈ സൂപ്പർ കിംഗ്സ്. 7 വിക്കറ്റിനാണ് ചെന്നൈയുടെ തകർപ്പൻ ജയം.
ടോസ് നേടി ബൗളിംഗ് തിരഞ്ഞെടുത്ത ചെന്നൈക്ക് മുന്നിൽ മുംബൈ 20 ഓവറിൽ 157ന് 8 എന്ന ടോട്ടൽ പടുത്തുയർത്തി. 18.1 ഓവറിൽ 3 വിക്കറ്റ് മാത്രം നഷ്ടപ്പെടുത്തി ചെന്നൈ വിജയലക്ഷ്യം മറികടന്നു. വിമർശകരുടെ വായടപ്പിച്ച് തകർപ്പൻ അർദ്ധ സെഞ്ച്വറി നേടിയ അജിങ്ക്യ രഹാനെയാണ് ചെന്നൈയുടെ വിജയ ശിൽപ്പി. രഹാനെ 27 പന്തിൽ 7 ബൗണ്ടറികളുടെയും 3 സിക്സറുകളുടെയും അകമ്പടിയോടെ 61 റൺസെടുത്തു. 40 റൺസുമായി പുറത്താകാതെ നിന്ന ഓപ്പണർ ഋതുരാജ് ഗെയ്ക്വാദ് രഹാനെക്ക് മികച്ച പിന്തുണ നൽകി.
നേരത്തേ, 4 ഓവറിൽ 20 റൺസ് മാത്രം വഴങ്ങി 3 വിക്കറ്റ് വീഴ്ത്തിയ രവീന്ദ്ര ജഡേജയും 2 വിക്കറ്റുകൾ വീതം വീഴ്ത്തിയ മിച്ചൽ സാന്റ്നറും തുഷാർ ദേശ്പാണ്ഡെയും ചേർന്നാണ് മുംബൈ ബാറ്റിംഗിന്റെ നട്ടെല്ലൊടിച്ചത്. 32 റൺസെടുത്ത ക്യാപ്ടൻ രോഹിത് ശർമ്മയാണ് മുംബൈയുടെ ടോപ് സ്കോറർ. ടിം ഡേവിഡ് 31 റൺസെടുത്തു.
Discussion about this post