തിരുവനന്തപുരം: ബാര്‍ കോഴ കേസിലെ കോടതി വിധി സംബന്ധിച്ച് സര്‍ക്കാരിനെതിരെ പരസ്യ പ്രസ്താവന നടത്തിയെന്ന ആരോപണത്തില്‍ പൊലീസ് ഹൗസിംഗ് കണ്‍സ്ട്രക്ഷന്‍ ഡി.ജി.പി ജേക്കബ് തോമസിനെതിരെ നടപടി വേണ്ടെന്ന് പറഞ്ഞിട്ടില്ലെന്ന് ആഭ്യന്തര മന്ത്രി രമേശ് ചെന്നിത്തല.
ഇത്തരം വാര്‍ത്തകള്‍ തെറ്റാണെന്നും ജേക്കബ് തോമസിന്റെ വിശദീകരണം ലഭിച്ച ശേഷം തീരുമാനമെടുക്കുമെന്നും അദ്ദേഹം മാധ്യമപ്രവര്‍ത്തകരോട് പറഞ്ഞു. നേരത്തെ ഇക്കാര്യത്തില്‍ നടപടി വേണ്ടെന്നും ഇക്കാര്യം രമേശ് ചെന്നിത്തല മുഖമന്ത്രിയോട് ആവശ്യപ്പെട്ടെന്നും വാര്‍ത്തകള്‍ വന്നിരുന്നു.
ബാര്‍ക്കോഴ കേസില്‍ ഹൈക്കോടതി വിധി സംബന്ധിച്ച് സര്‍ക്കാറിനെ പ്രതികൂട്ടിലാക്കുന്ന തരത്തില്‍ പരസ്യ പ്രസ്താവന നടത്തിയെന്ന് കാട്ടി ചീഫ് സെക്രട്ടറി ജിജി തോംസണ്‍ കാരണം കാണിക്കല്‍ നോട്ടീസ് നല്‍കിയിരുന്നു.
അതേ സമയം സര്‍ക്കാരിനെ താന്‍ ഒരു തരത്തിലും വിമര്‍ശിച്ചിട്ടില്ലെന്ന് ജേക്കബ് തോമസ് പറഞ്ഞിരുന്നു. കോടതി വിധി വന്നപ്പോള്‍ മാദ്ധ്യമ പ്രവര്‍ത്തകരുടെ ചോദ്യത്തിന് മറുപടി നല്‍കു മാത്രമാണ് ചെയ്തത്. സര്‍ക്കാരിനെയോ മുഖ്യമന്ത്രിയെയോ വിമര്‍ശിച്ചിട്ടില്ലെന്നും ജേക്കബ് തോമസ് വ്യക്തമാക്കി.
Discussion about this post