എംവി ഗോവിന്ദനെ വെല്ലുവിളിച്ച് സ്വപ്‌ന; കേസ് കൊടുത്ത് വിരട്ടാമെന്നത് സ്വപ്‌നത്തിൽ മാത്രമേ നടക്കൂയെന്ന് കുറിപ്പ്

തിരുവനന്തപുരം: സിപിഎം സംസ്ഥാന സെക്രട്ടറി എംവി ഗോവിന്ദനെ വെല്ലുവിളിച്ച് സ്വപ്‌ന സുരേഷ്. കേസ് കൊടുത്ത് വിരട്ടാമെന്നത് ഇനി സ്വപ്‌നത്തിൽ മാത്രമേ നടക്കുകയുള്ളൂയെന്ന് സ്വപ്‌ന പറഞ്ഞു. ഫേസ്ബുക്കിലൂടെയാണ് വെല്ലുവിളി. കോർട്ട് ഫീ അടച്ച് 10 കോടി നഷ്ടപരിഹാരം ചോദിച്ചുള്ള കേസ് സിവിൽ കോടതിയിലും കൊടുക്കണം എന്ന് സ്വപ്ന പോസ്റ്റിലൂടെ ആവശ്യപ്പെട്ടു. എം വി ഗോവിന്ദനെ കോടതിയിൽ വെച്ച് കാണാൻ കാത്തിരിക്കുന്നെന്നും സ്വപ്‌ന ഫേസ്ബുക്കിൽ കുറിച്ചു.

പോസ്റ്റിന്റെ പൂർണരൂപം:

ഗോവിന്ദൻ… കോടതിയിലേക്ക് സ്വാഗതം.
ഗോവിന്ദൻ ഇനി നമുക്ക് കോടതിയിൽ കാണാം.
കേസ് കൊടുത്ത് എന്നെ വിരട്ടാം എന്നത് സ്വപ്നത്തിൽ മാത്രമേ നടക്കൂ എന്ന് സ്വപ്ന അങ്ങയെ അറിയിക്കുന്നു.
എന്റെ അപേക്ഷ അങ്ങ് 10 കോടി നഷ്ടപരിഹാരം ചോദിച്ച് കോർട്ട് ഫീ അടച്ച് സിവിൽ കോടതിയിലും കേസ് കൊടുക്കണം എന്നാണ്.
ഗോവിന്ദനെ കോടതിയിൽ വെച്ച് കാണാൻ ഞാൻ കാത്തിരിക്കുന്നു.
This time it’s only in malayalam, as it is only for Mr. MALAYALEE Govindan, I want him to understand my message very clearly–!

ഇന്ന് വൈകുന്നരേത്തോടെയാണ് തനിക്കെതിരായി നടത്തിയ പരാമർശങ്ങളിൽ സിപിഐ എം സംസ്ഥാന സെക്രട്ടറി എം വി ഗോവിന്ദൻ മാനനഷ്ടക്കേസ് ഫയൽ ചെയ്തത്. തളിപ്പറമ്പ് കോടതിയിൽ നേരിട്ടെത്തിയാണ് അദ്ദേഹം ഹർജി നൽകിയത്. ഐപിസി 120 ബി, 500 എന്നീ വകുപ്പുകൾ പ്രകാരം കേസെടുക്കണമെന്നാണ് ആവശ്യം. കോടതി പരാതി ഫയലിൽ സ്വീകരിച്ചു.