മലപ്പുറം: കരിപ്പൂർ വിമാനത്താവളം വഴി വീണ്ടും സ്വർണം കടത്താൻ ശ്രമം. അര കിലോ സ്വർണവുമായി കോഴിക്കോട് സ്വദേശിയെ പിടികൂടി. കസ്റ്റംസിന്റെ കണ്ണുവെട്ടിച്ച് എത്തിയ ഇയാളെ വിമാനത്താവളത്തിന് പുറത്ത് നിന്നാണ് പോലീസ് പിടികൂടിയത്.
കോഴിക്കോട് ഉണ്ണികുളം സ്വദേശി ജംഷാദാണ് സ്വർണം കടത്താൻ ശ്രമിച്ചത് എന്നാണ് പോലീസ് നൽകുന്ന വിവരം. സ്വർണം പൊടിയാക്കി അടിവസ്ത്രത്തിൽ തേച്ച് പിടിപ്പിച്ചായിരുന്നു ജംഷാദ് കൊണ്ടുവന്നത്. അതുകൊണ്ടുതന്നെ കസ്റ്റംസിന്റെ പരിശോധനയിൽ ഇത് കണ്ടെത്താൻ കഴിഞ്ഞില്ല.
വിദേശത്ത് നിന്നും ജംഷാദ് സ്വർണം കൊണ്ടുവരുന്നതായി പോലീസിന് രഹസ്യവിവരം ലഭിച്ചിരുന്നു. ഇതിന്റെ അടിസ്ഥാനത്തിലായിരുന്നു പോലീസ് സംഘം വിമാനത്താവളത്തിന് പുറത്ത് എത്തിയത്. മലപ്പുറം ജില്ലാ പോലീസ് മേധാവി എസ്. സുജിത് ദാസ് ഐപിഎസിനായിരുന്നു രഹസ്യവിവരം ലഭിച്ചിരുന്നത്.
ദുബായിൽ നിന്നും സ്പൈസ് ജെറ്റ് വിമാനത്തിലാണ് ജംഷാദ് സ്വർണവുമായി എത്തിയത്. സംഭവത്തിൽ പോലീസ് വിശദമായ അന്വേഷണം ആരംഭിച്ചു. ഇയാൾ കടത്തിക്കൊണ്ടുവന്ന സ്വർണത്തിന്റെ മൂല്യം പരിശോധിച്ചുവരികയാണ്. സ്വർണക്കടത്ത് സംഘത്തെക്കുറിച്ചുള്ള കൂടുതൽ വിവരങ്ങൾക്കായി ജംഷാദിനെ വിശദമായി ചോദ്യം ചെയ്തുവരികയാണ്.
