കൊച്ചി: രക്ഷകന്റെ വേഷത്തിലെത്തി അപകടത്തിൽ പരിക്കേറ്റ് കിടന്ന ആളെ ആശുപത്രിയിലാക്കി ബൈക്കുമായി കടന്ന യുവാവിനെ പോലീസ് പൊക്കി. കൊച്ചിയിലാണ് രസകരമായ മോഷണം നടന്നത്. കഴിഞ്ഞ 24 നായിരുന്നു സംഭവം.
ഫോർട്ടുകൊച്ചി ലാസർ ലൈൻ കരുവേലി വീട്ടിൽ 25 വയസുള്ള വിഷ്ണു രാജേഷിനെയാണ് എറണാകുളം സെൻട്രൽ പോലീസ് സ്റ്റേഷൻ ഇൻസ്പെക്ടർ അനീഷ് ജോയിയുടെ നേതൃത്തിലുളള പോലീസ് സംഘം അറസ്റ്റ് ചെയ്തത്. പോലീസ് അന്വേഷിച്ചതിൽ ഇയാൾ പല കേസുകളിലും പ്രതിയാണെന്ന് അറിഞ്ഞു. തുടർന്നാണ് പിടികൂടിയത്.
പുലർച്ചെ മൂന്നര മണിക്ക് സുഹൃത്തിന്റെ ബൈക്കിൽ എറണാകുളം ഭാഗത്തേക്ക് വന്ന കൊടുങ്ങല്ലൂർ സ്വദേശി അർജ്ജുൻ തമ്മനത്ത് വച്ച് അപകടത്തിൽ പെട്ടു. ബൈക്ക് കാലിൽ വീണതുകൊണ്ട് അർജ്ജുന് എഴുന്നേൽക്കാൻ കഴിയാത്ത അവസ്ഥയിലായിരുന്നു. ഈ സമയം അതുവഴി വന്ന വിഷ്ണു ഇയാളെ എഴുന്നേൽപ്പിച്ച് ബൈക്കിൽ കയറ്റി എറണാകുളം ഗവൺമെന്റ് ആശുപത്രിയിൽ എത്തിച്ചു.
അർജ്ജുൻ ഡോക്ടറെ കാണുന്ന സമയം വിഷ്ണു വാഹനവുമായി കടക്കുകയായിരുന്നു. ഒന്നരലക്ഷത്തോളം വില വരുന്ന യമഹ ആർ വൺ ഫൈവ് വി ത്രീ ബൈക്ക് ആണ് വിഷ്ണു കവർന്നത്. കേസ് നടപടികളുടെ ഭാഗമായി ബൈക്കും പോലീസ് കസ്റ്റഡിയിൽ എടുത്തു.
Discussion about this post