ഗുവാഹത്തി: ഏകീകൃത സിവിൽ കോഡ് രാജ്യത്ത് നടപ്പിലാക്കേണ്ടത് അനിവാര്യമാണെന്ന് ഉപരാഷ്ട്രപതി ജഗദീപ് ധൻകർ. ഏകീകൃത സിവിൽ കോഡ് രാജ്യത്തെ ഒന്നിപ്പിക്കുമെന്നും അദ്ദേഹം പറഞ്ഞു. ഇന്ത്യൻ ഇൻസ്റ്റിറ്റ്യൂട്ട് ഓഫ് ടെക്നോളജിയിൽ നടന്ന 25ാമത് കോൺവൊക്കേഷൻ ചടങ്ങിൽ സംസാരിക്കുകയായിരുന്നു അദ്ദേഹം.
ഭരണഘടന വിഭാവനം ചെയ്യുന്ന ചില കാര്യങ്ങൾ രാജ്യത്ത് നടപ്പിലാക്കേണ്ടത് കേന്ദ്ര-സംസ്ഥാന സർക്കാരുകളുടെ ഉത്തരവാദിത്വമാണ്. ഏകീകൃത സിവിൽ കോഡ് നടപ്പിലാക്കുന്നതുമായി ബന്ധപ്പെട്ട് ചിലരിൽ നിന്നും ഉയർന്നുവന്ന പ്രതികരണം അക്ഷരാർത്ഥത്തിൽ ഞെട്ടിച്ചു. രാജ്യത്തെ ജനങ്ങളുടെ സംരക്ഷണത്തിനായി ഈ നിയമം നടപ്പിലാക്കേണ്ടതുണ്ടെന്നും ധൻകർ പ്രതികരിച്ചു.
ഇന്നല്ലെങ്കിൽ നാളെ ഏകീകൃത സിവിൽ കോഡ് രാജ്യത്ത് നടപ്പിലാക്കേണ്ടിതന്നെ വരും. നിയമം നടപ്പിലാക്കുന്നത് വൈകിപ്പിക്കുന്നത് നമ്മുടെ മൂല്യശോഷണം കൂടിയാണ്. ഏകീകൃത സിവിൽ കോഡ് നമ്മുടെ രാജ്യത്തെയും ദേശീയതയെയും കൂടുതൽ ശക്തമാക്കുമെന്നും അദ്ദേഹം കൂട്ടിച്ചേർത്തു.
