ലക്നൗ: സർക്കാർ ജോലിയിൽ യുവാക്കൾ നേരിട്ടിരുന്ന വലിയ പ്രതിസന്ധിയായ വഴിവിട്ട നീക്കങ്ങൾ അവസാനിപ്പിച്ചതായി യുപി മുഖ്യമന്ത്രി യോഗി ആദിത്യനാഥ്. സംസ്ഥാനത്തെ സർക്കാർ നിയമനങ്ങൾ ഇപ്പോൾ സുതാര്യമായിട്ടാണ് നടക്കുന്നതെന്നും മുഖ്യമന്ത്രി ചൂണ്ടിക്കാട്ടി. ജോലിക്ക് തിരഞ്ഞെടുക്കുന്നതിലും നിയമനത്തിലും നിലനിന്ന വിവേചനങ്ങൾ അവസാനിപ്പിച്ചതായും അദ്ദേഹം അവകാശപ്പെട്ടു.
ജോലി നൽകുന്നതിൽ കാണിക്കുന്ന വേർതിരിവ് ഒരു സർക്കാർ ചെയ്യുന്ന ഏറ്റവും വലിയ പാപമാണ്. അങ്ങനെ ചെയ്ത സർക്കാരുകളെ ജനങ്ങൾ ഉചിതമായ പാഠം പഠിപ്പിച്ചിട്ടുണ്ടെന്നും അദ്ദേഹം കൂട്ടിച്ചേർത്തു. ഉത്തർപ്രദേശ് പബ്ലിക് സർവീസ് കമ്മീഷൻ, ഉത്തർപ്രദേശ് സബോർഡിനേറ്റ് സർവീസസ് സെലക്ഷൻ കമ്മീഷൻ പരീക്ഷകളിൽ തിരഞ്ഞെടുത്ത പുതിയതായി നിയമിതരായ ഉദ്യോഗസ്ഥർക്ക് നിയമന ഉത്തരവുകൾ വിതരണം ചെയ്യുന്ന പരിപാടിയിൽ സംസാരിക്കുകയായിരുന്നു അദ്ദേഹം.
കഴിഞ്ഞ ആറു വർഷത്തിനിടയിൽ 6 ലക്ഷം യുവജനങ്ങൾക്ക് ജോലി നൽകാൻ യുപി സർക്കാരിന് സാധിച്ചു. 2021 മുതൽ 2023 വരെ ഒന്നരവർഷക്കാലത്തിനുള്ളിൽ 16 അപ്പോയിൻമെന്റ് ലെറ്റർ പരിപാടികൾ സംഘടിപ്പിക്കാനും അതിൽ ഏകദേശം 55000 യുവാക്കൾക്ക് ജോലി നൽകാനും സർക്കാരിന് കഴിഞ്ഞു. ഇന്ന് ഉത്തർപ്രദേശിലെ നിയമന നടപടികൾക്കെതിരെ ആർക്കും വിരൽ ചുണ്ടാനാകില്ലെന്നും അദ്ദേഹം പറഞ്ഞു.
2017 മുമ്പ് ഉത്തർപ്രദേശിലെ തൊഴിലില്ലായ്മയുടെ നിരക്ക് 19 ശതമാനത്തിലേറെയായിരുന്നു. എന്നാൽ 6 വർഷം കൊണ്ട് തൊഴിലില്ലായ്മയുടെ നിരക്ക് വിജയകരമായി ഈ സർക്കാർ കുറച്ചു. രണ്ടുകോടിയിലധികം യുവാക്കളെ സ്വയം തൊഴിലിനായി ബന്ധിപ്പിക്കാനും സർക്കാരിന് കഴിഞ്ഞു. സംസ്ഥാനത്തെ ഉന്നത വിദ്യാഭ്യാസം, സെക്കൻഡറി വിദ്യാഭ്യാസം, പ്രാഥമിക വിദ്യാഭ്യാസ തിരഞ്ഞെടുപ്പ് കമ്മീഷൻ എന്നിവയുടെ നടപടിക്രമങ്ങളെ സംയോജിപ്പിച്ച് വിദ്യാഭ്യാസ കമ്മീഷൻ രൂപീകരിക്കാൻ ഒരുങ്ങുകയാണ് സർക്കാരിപ്പോൾ.
പ്രധാനമന്ത്രി നരേന്ദ്രമോദി രാജ്യത്തിന്റെ സമ്പദ്വ്യവസ്ഥയെ 5 ട്രില്യൻ ഡോളർ സമ്പദ്വ്യവസ്ഥയാക്കി മാറ്റാൻ ഒരുങ്ങുകയാണെന്നും അതിൽ ഉത്തർപ്രദേശിന്റെ പങ്ക് വളരെ നിർണായകമാണെന്നും അദ്ദേഹം പ്രസ്താവിച്ചു. ഭരണഘടന നൽകുന്ന സംവരണത്തിന്റെ ആനുകൂല്യങ്ങൾ സമൂഹത്തിലെ എല്ലാ വിഭാഗങ്ങളിലേക്കും എത്തിച്ചേർന്നിരിക്കുന്നെന്നും അദ്ദേഹം പറഞ്ഞു.
പശ്ചിമ ബംഗാളിൽ തിരഞ്ഞെടുപ്പിനിടെയുണ്ടായ അക്രമങ്ങളെക്കുറിച്ചും അദ്ദേഹം പ്രസംഗത്തിൽ സൂചിപ്പിച്ചു. ജനാധിപത്യത്തിന്റെ പേരിൽ മുറവിളി കൂട്ടുന്നവർ ജനാധിപത്യത്തിന് തന്നെ ദോഷം ചെയ്യുകയാണെന്ന് അദ്ദേഹം പറഞ്ഞു.
Discussion about this post