ടൊയോട്ട അടുത്തിടെ പുറത്തിറക്കിയ ഹൈലെക്സ് എന്ന ലൈഫ് സ്റ്റൈൽ പിക്കപ്പ് വാഹനം ഇനി ഇന്ത്യൻ സൈന്യത്തിന്റെ ഭാഗമാകും. 13,000 അടി വരെ ഉയരമുള്ള പ്രദേശങ്ങളിലും പൂജ്യം ഡിഗ്രിയിലും താഴെ തണുപ്പുള്ള കാലാവസ്ഥയിലും വിജയകരമായ ഓഫ് റോഡ് അനുഭവം നൽകുന്നതിനാലാണ് ഈ വാഹനത്തെ ഇനി സൈന്യത്തിന്റെ ഭാഗമാക്കുന്നത്. വാഹനത്തിന്റെ കഴിവുകളും അതിജീവന ശക്തിയും പരിശോധിക്കുന്നതിനായി രണ്ടുമാസത്തോളം നീണ്ടുനിന്ന പരീക്ഷണഡ്രൈവ് നടത്തിയതിനുശേഷം ആണ് ഇന്ത്യൻ സൈന്യം ഈ തീരുമാനം എടുത്തത്.
ഓഫ് റോഡ് വാഹനപ്രേമികൾക്കിടയിൽ മികച്ച അഭിപ്രായമുള്ള ലൈഫ് സ്റ്റൈൽ പിക്കപ്പ് ആണ് ടൊയോട്ടയുടെ ഹൈലെക്സ്. കാഠിന്യമേറിയ ഭൂപ്രകൃതികളിലും മോശം കാലാവസ്ഥകളിലും അതിജീവിക്കേണ്ടി വരുന്ന ഇന്ത്യൻ സൈന്യത്തിന് മികച്ച ഡ്രൈവിംഗ് അനുഭവം നൽകാൻ ഹൈലെക്സിന് കഴിയുമെന്ന് നിരവധി പരീക്ഷണങ്ങളിലൂടെ തെളിയിച്ച ശേഷമാണ് ഈ വാഹനത്തെ സൈന്യത്തിലേക്ക് എടുക്കുന്നത്. ഇന്ത്യൻ സൈന്യത്തിന്റെ നോർത്തേൺ കമാൻഡിന്റെ കീഴിലായിരുന്നു ഈ വാഹനത്തിന്റെ പരീക്ഷണങ്ങൾ നടത്തിയത്.
ആകർഷകമായ ഓഫ്റോഡ് ശേഷിയും കുറഞ്ഞ റേഞ്ച് ട്രാൻസ്ഫർ കെയ്സുള്ള ശരിയായ 4×4 ടയർ സിസ്റ്റവും, ലിമിറ്റഡ് സ്ലിപ്പ് ഡിഫറൻഷ്യൽ, ഇലക്ട്രോണിക് ഡിഫറൻഷ്യൽ ലോക്ക്, മുകളിലേക്കും താഴേക്കും ഉള്ള ഹിൽ അസിസ്റ്റ് കൺട്രോൾ, ടയർ ആംഗിൾ മോണിറ്റർ, വാട്ടർ വേഡിംഗ് ഡെപ്ത് എന്നിവ ടൊയോട്ട ഹൈലെക്സിന്റെ പ്രധാന പ്രത്യേകതകളാണ്. മികച്ച കാർഗോ കപ്പാസിറ്റി ഉള്ളതിനാൽ ഈ വാഹനത്തെ ഒരു വർക്ക് ട്രക്ക് ആയും ഉപയോഗിക്കാവുന്നതാണ്. മികച്ച ബിൽഡ് ക്വാളിറ്റി ഉള്ള ദൃഢതയുള്ള ബോഡി, 7 എയർബാഗുകൾ, ESP, ISOFIX അടക്കമുള്ള മികച്ച സുരക്ഷാസംവിധാനങ്ങളും ഈ വാഹനത്തിനുണ്ട്.
Discussion about this post