ദുബായിലെ ഷെയ്ഖ് ഹമദ് ബിൻ ഹംദാൻ അൽ നഹ്യാൻ ഒരു വാഹനപ്രേമി ആയാണ് അറിയപ്പെടുന്നത്. തന്റെ സമ്പത്തിന്റെ ഒരു ഭാഗം ആകർഷകമായ കാറുകൾ ശേഖരിക്കുന്നതിനായാണ് ഇദ്ദേഹം വിനിയോഗിക്കുന്നത്. ഷെയ്ഖ് ഹമദ് ബിൻ ഹംദാന്റെ ശേഖരത്തിലുള്ള ഒരു വാഹനമാണ് ഇപ്പോൾ ലോകമെമ്പാടുമുള്ള വാഹന പ്രേമികളുടെ ശ്രദ്ധ കവരുന്നത്. സാധാരണ മോഡലിന്റെ മൂന്നിരട്ടി വലിപ്പമുള്ള ഒരു വലിയ ഹമ്മർ H1 X3 ആണ് ഈ അത്ഭുത വാഹനം. ഷെയ്ഖ് ഹമദിനായി പ്രത്യേകം ഒരുക്കിയിരിക്കുന്ന ഒരു വാഹനമാണ് ഇത്.
ഏകദേശം 46 അടി നീളവും 21.6 അടി ഉയരവും 19 അടി വീതിയും ഉള്ളതാണ് ഷെയ്ഖ് ഹമദിന്റെ ഈ അസാധാരണ വാഹനം. ലോകത്തിലെ തന്നെ ഏറ്റവും വലിയ SUV ആണിത്. അസാധാരണമായ വലുപ്പം മാത്രമല്ല ഈ വാഹനത്തിന്റെ ഇന്റീരിയർ ഡിസൈനും വ്യത്യസ്തമാണ്. ഒരു വീടിനോട് സാമ്യമുള്ളതാണ് ഈ വാഹനത്തിന്റെ ഇന്റീരിയർ. രണ്ടുനിലകളിലായി ഒരു സ്വീകരണമുറിയും ടോയ്‌ലറ്റും എല്ലാം അടങ്ങുന്നതാണ് ഈ വാഹനത്തിന്റെ ഉൾവശം. രണ്ടാം നിലയിലാണ് വാഹനത്തിന്റെ സ്റ്റിയറിങ് ക്യാബിൻ എന്നുള്ളതും ഈ ഭീമൻ വാഹനത്തിന്റെ സവിശേഷതയാണ്.
ഒരു സാധാരണ ഹമ്മർ H1 ന്റെ മൂന്നിരട്ടി വലുപ്പമാണ് ഷെയ്ഖ് ഹമദിന് വേണ്ടി പ്രത്യേകം നിർമ്മിച്ച ഈ ഹമ്മറിന് ഉള്ളത്. അതിനാൽ തന്നെ ഹമ്മർ H1 X3 എന്നാണ് ഈ വാഹനം അറിയപ്പെടുന്നത്. ഓരോ ചക്രത്തിലും വ്യക്തിഗത ഡീസൽ എഞ്ചിനുകളാൽ പ്രവർത്തിക്കുന്ന വാഹനം പൂർണ്ണമായും പ്രവർത്തനക്ഷമമാണ്. മാത്രമല്ല 4×4 വീൽ ഡ്രൈവ് കഴിവുകളും കൂടി ഈ വാഹനത്തിനുണ്ട്.
ആംഫിബിയസ് കാർഗോ വാഹനമായ LARC LX-ൽ നിർമ്മിച്ച ഹമ്മർ H1 X3യ്ക്ക് കരുത്തുപകരുന്നത് അതിന്റെ നാല് ഡീസൽ എഞ്ചിനുകളാണ്. ഈ അസാധാരണ വാഹനത്തിന്റെ പരമാവധി വേഗത മണിക്കൂറിൽ 32 കിലോമീറ്റർ ആണ്. നിലവിൽ യുഎഇയിൽ ഷാർജയിലെ ഓഫ് റോഡ് ഹിസ്റ്ററി മ്യൂസിയത്തിൽ പ്രദർശിപ്പിച്ചിരിക്കുകയാണ് ഈ ഹമ്മർ H1 X3.
Discussion about this post