ലണ്ടൻ : ബ്രിട്ടണിൽ ഏറ്റവും സ്റ്റൈലിഷായി വസ്ത്രം ധരിക്കുന്നവരുടെ പട്ടികയിൽ ഒന്നാമതെത്തി പ്രധാനമന്ത്രി ഋഷി സുനകിന്റെ പത്‌നി അക്ഷത മൂർത്തി. ടാറ്റ്‌ലർ മാഗസിന്റെ 2023 ലെ പട്ടികയിലാണ് വ്യവസായിയും ഫാഷൻ ഡിസൈനറുമായ അക്ഷത ഇടം നേടിയത്. ഇൻഫോസിസ് സ്ഥാപകൻ നാരായണ മൂർത്തിയുടെയും എഴുത്തുകാരിയും ജീവകാരുണ്യപ്രവർത്തകയുമായ സുധ മൂർത്തിയുടെയും മകളാണ് അക്ഷത മൂർത്തി.
‘ഏറ്റവും മികച്ച രീതിയിൽ വസ്ത്രധാരണം ചെയ്യുന്നവരുടെ പട്ടികയിൽ ഒന്നാം സ്ഥാനം നേടിയത് ഡൗണിംഗ് സ്ട്രീറ്റിലെ ഷാറ്റ്ലൈൻ അക്ഷതാ മൂർത്തിയാണ്,’ ടാറ്റ്ലറിന്റെ സ്‌റ്റൈൽ എഡിറ്റർ പറഞ്ഞു. ഫസ്റ്റ് ലേഡി ഫാബുലസ് എന്നാണ് മാഗസിൻ അക്ഷതയെ വിശേഷിപ്പിച്ചത്. ലവ് ആക്ച്വലി സ്റ്റാറായ ബിൽ നൈഗി, സാറാ റോസ് ചോൽമോണ്ടലെ, ബിയാട്രിസ് രാജകുമാരിയുടെ ഭർത്താവ് എഡോർഡോ മാപ്പെല്ലി മോസി എന്നിവരെ പിന്നിലാക്കിക്കൊണ്ടാണ് അക്ഷത ഒന്നാം സ്ഥാനത്തെത്തിയത്.
പിൽബോക്‌സ് ഹാറ്റുകളും വിശിഷ്ടമായ മുത്തുകൾ പതിപ്പിച്ച ആഭരണങ്ങളും ഇല്ലെങ്കിലും ആധുനിക കാലത്തെ ഏറ്റവും മികച്ച വസ്ത്രധാരണത്തിന്റെ ഉദാഹറണമാണ് അക്ഷത എന്നും മാഗസിൻ കുറിച്ചു. കളർഫുൾ വസ്ത്രങ്ങൾ ധരിക്കാൻ ഇഷ്ടമുള്ള അക്ഷതയെ വേറിട്ട് നിർത്തിയത് കൂൾ ലുക്കും ഫാഷൻ സ്‌റ്റൈലും തന്നെയാണ്.
Discussion about this post