തിരുവനന്തപുരം: വികസനം മുകളിലേക്ക് മാത്രമല്ല, താഴേയ്ക്കും ആകാമെന്നും ഡിജിപി ജേക്കബ് തോമസ്. ഹൈറേഞ്ച് ബില്‍ഡേഴ്‌സായ നിക്ഷിപ്ത താത്പര്യക്കാരാണ് കേരളത്തിന്റെ വികസനം തീരുമാനിക്കുന്നതെന്നും, വികസനം മുകളിലേയ്ക്ക് മാത്രമായാല്‍ ചെന്നൈയിലെ പോലുളള ദുരന്തങ്ങള്‍ക്ക് കേരളവും സാക്ഷിയാകേണ്ടി വരുമെന്നും ജേക്കബ് തോമസ് പറഞ്ഞു.
അഴിമതിക്കെതിരെ സംസാരിച്ചാല്‍ നാല് മെമ്മോയെങ്കിലും കിട്ടും. മിണ്ടരുതെന്ന അറിയിപ്പ് പിന്നാലെ വരും. തുടര്‍ന്ന് സസ്‌പെന്‍ഷനും സ്ഥലംമാറ്റവും കിട്ടും -അദ്ദേഹം പറഞ്ഞു. മുല്ലപ്പെരിയാര്‍ ദുരന്തനിവാരണ ഡെപ്യൂട്ടി കളക്ടറെ അഴിമതിക്കെതിരെ നടപടിയെടുത്തതിന് സ്ഥലംമാറ്റി. അനധികൃത കൈയേറ്റം ഒഴിപ്പിക്കാന്‍ ശ്രമിച്ചതാണ് അദ്ദേഹം ചെയ്ത തെറ്റ്.
മൂന്ന് വിജിലന്‍സ് എഫ്.ഐ.ആര്‍. എങ്കിലുമുണ്ടെങ്കിേല സെക്രട്ടറിയാകൂവെന്നതാണ് സ്ഥിതി. കടുത്ത അഴിമതിക്കാര്‍ നാണംകെട്ടും അവരുടെ അഴിമതി മറയ്ക്കാന്‍ ശ്രമിക്കുന്നു. പാറമടകളിലാണ് ഏറ്റവും കൂടുതല്‍ അഴിമതി. ഒന്നിന്റെ മറവില്‍ 17 പാറമടകള്‍ വരെ പ്രവര്‍ത്തിക്കുന്നുണ്ടെന്നും അദ്ദേഹം പറഞ്ഞു.
അഴിമതിക്ക് എതിരായി സംസ്ഥാനത്ത് ഒരു നിയമമുണ്ടോ എന്ന കാര്യം സംശയമാണെന്നും, എത്തരത്തിലുളള വികസനം ആണെങ്കിലും പരിസ്ഥിതി സൗഹൃദപരമാകണമെന്നും അദ്ദേഹം കൂട്ടിച്ചേര്‍ത്തു. പേടികൊണ്ട് അഴിമതിക്കെതിരെ മിക്കവരും ശബ്ദം ഉയര്‍ത്തില്ലെന്നും, അല്ലെങ്കില്‍ പ്രമോഷന്‍ അടക്കമുളളത് നഷ്ടപ്പെടുമെന്ന പേടിയാണ് ഇവര്‍ക്കെന്നും മാധ്യമങ്ങളാണ് അഴിമതിക്കെതിരെ പോരാടുവാന്‍ നില്‍ക്കേണ്ടതെന്നും അദ്ദേഹം പറഞ്ഞു.
കടുത്ത അഴിമതിക്കാരായവര്‍ അഴിമതിയെ എപ്പോഴും ന്യായീകരിച്ചിട്ടുണ്ടെന്നും, അഴിമതിക്കാരല്ലാത്തവരെ നിശബ്ദരാക്കുകയാണ് എപ്പോഴും ഉണ്ടാകുന്നതെന്നും ജേക്കബ് തോമസ് കൂട്ടിച്ചേര്‍ത്തു. കേരളം നെക്സ്റ്റ് സംഘടിപ്പിച്ച ‘അഴിമതിരഹിത കേരളത്തിന് സുസ്ഥിരവികസനം’ എന്ന വിഷയത്തില്‍ സംസാരിക്കുകയായിരുന്നു അദ്ദേഹം.
Discussion about this post