തിരുവനന്തപുരം: തിരുവനന്തപുരത്തെ ഡിഫറന്റ് ആർട് സെന്ററിന് ഒരു ലക്ഷം രൂപ കൈമാറി മോഹൻലാൽ മോഹൻലാൽ ഫാൻസ് കൾച്ചറൽ ആന്റ് വെൽഫെയർ അസോസിയേഷൻ. സംഘടനയുടെ കോഴിക്കോട് ജില്ലാ കമ്മിറ്റിയാണ് തുക കൈമാറിയത്. നടൻ മോഹൻലാൽ ആണ് ഇക്കാര്യം ഫേസ്ബുക്കിലൂടെ അറിയിച്ചത്.
അർത്ഥമുണ്ടാകുമ്പോഴാണ് ജീവിതത്തിലെ നല്ല നിമിഷങ്ങൾ അനശ്വരമാകുന്നതെന്ന വാക്കുകളോടെ ആയിരുന്നു മോഹൻലാലിന്റെ കുറിപ്പ്. സെന്ററിന് തുക കൈമാറിയ നിമിഷം അർത്ഥപൂർണ്ണവും അതോടൊപ്പം അനശ്വരവുമാണെന്നും ഈ സത്കർമ്മം ചെയ്ത എന്റെ പ്രിയപ്പെട്ടവർക്കും അതിൽ പങ്കാളിയായ മുതുകാടിനും എല്ലാ നന്മകളും നേരുന്നുവെന്നും മോഹൻലാൽ കുറിച്ചു.
ആർട് സെന്ററിന് നേതൃത്വം നൽകുന്ന മജീഷ്യൻ ഗോപിനാഥ് മുതുകാടിന് തുകയുടെ ചെക്ക് കൈമാറി. മുതുകാടിന്റെ നേതൃത്വത്തിലാണ് ഭിന്നശേഷിക്കാരായ കുട്ടികൾക്കായി തിരുവനന്തപുരത്ത് ഡിഫറന്റ് ആർട് സെന്റർ പ്രവർത്തിക്കുന്നത്. ഇത്തരം കുട്ടികളെ സമൂഹത്തിന്റെ മുഖ്യധാരയിലേക്ക് കൊണ്ടുവരുന്നതിനും അവരുടെ കലാപരമായ അഭിരുചികൾ പ്രോത്സാഹിപ്പിക്കുന്നതിനും ലക്ഷ്യമിട്ടായിരുന്നു സെന്റർ സ്ഥാപിച്ചത്.
മുതുകാടിന്റെയും മറ്റ് വിദഗ്ധരുടെയും നേതൃത്വത്തിൽ മാജിക് ഉൾപ്പെടെയുള്ള വിവിധയിനങ്ങളിലാണ് ഇവിടുത്തെ കുട്ടികൾ പരിശീലനം നേടുന്നത്. കുട്ടികളുടെ കലാപരിപാടികൾ ഇതിനോടകം പൊതുസമൂഹത്തിൽ ശ്രദ്ധ നേടിക്കഴിഞ്ഞിട്ടുണ്ട്. ദേശീയതലത്തിൽ ഉൾപ്പെടെ കുട്ടികളെ നിരവധി പരിപാടികളിൽ പങ്കെടുപ്പിക്കാനും മുതുകാടിന് കഴിഞ്ഞിട്ടുണ്ട്.
Discussion about this post