ശബരിമല: ശബരിമലയിൽ ദർശനം നടത്തി ചരട് പൂജിച്ച് കെട്ടി നടൻ സുരാജ് വെഞ്ഞാറമ്മൂട്. ചിങ്ങമാസ പൂജകൾക്കായി നട തുറന്നപ്പോഴാണ് സുരാജ് വെഞ്ഞാറമ്മൂട് അയ്യപ്പ സന്നിധിയിൽ എത്തിയത്.
നേരത്തെ ഒരു സ്വകാര്യ ചാനൽ പരിപാടിയിൽ അവതാരകനായിരിക്കെ സഹ അവതാരകയുടെ കൈയ്യിൽ കെട്ടിയ പൂജിച്ച ചരടിനെ പരിഹസിച്ച സുരാജിനെതിരെ സമൂഹമാദ്ധ്യമങ്ങളിൽ വ്യാപക പ്രതിഷേധം ഉയർന്നിരുന്നു. കൈയ്യിലെ ചരട് കണ്ട് ഇത് എന്താണെന്ന് ചോദിച്ചപ്പോൾ അതിനെ കളിയാക്കാൻ പാടില്ലെന്ന് അവതാരിക പറഞ്ഞു. എന്നാൽ ശരംകുത്തി ആലിന് മുൻപിൽ ചെന്നാൽ ഇതുപോലെ കെട്ടുകൾ കാണാമെന്നും ഇതൊക്കെ മോശം അല്ലേയെന്നുമുളള സുരാജിന്റെ വാക്കുകളാണ് വിശ്വാസികളിൽ പ്രകോപനം സൃഷ്ടിച്ചത്.
നന്നായി സാരിയൊക്കെ ഉടുത്ത് അത്യാവശ്യം ഗ്ലാമർ ഒക്കെ ഉണ്ട്. കൈയ്യിൽ അനാവശ്യമായി ചില ആലുകളിൽ കെട്ടിവെച്ചതുപോലെ എന്നാിയരുന്നു സുരാജിന്റെ വാക്കുകൾ. സുരാജിന്റെ പഴയ ഫോട്ടോകളിൽ ചരട് കെട്ടിയത് ഉയർത്തിക്കാട്ടിയും അന്ന് പലരും രംഗത്തെത്തിയിരുന്നു. പുതിയ ചിത്രവും സമൂഹമാദ്ധ്യമങ്ങളിൽ ചർച്ചകൾക്ക് തുടക്കമിട്ടിട്ടുണ്ട്.
ശബരിമലയെക്കുറിച്ചുളള വാർത്തകൾ പങ്കുവെയ്ക്കുന്ന ശബരിമല ന്യൂസ് അപ്ഡേറ്റ്സ് എന്ന സോഷ്യൽ മീഡിയ പേജാണ് സുരാജിന്റെ ചിത്രം പങ്കുവെച്ചത്. കുറി തൊട്ടതിനെയും ചരട് കെട്ടിയതിനെയും പലരും കമന്റുകളിലൂടെ ചൂണ്ടിക്കാണിക്കുന്നു. പഴയ സംഭവവും ഓർമ്മിപ്പിക്കുന്നുണ്ട്. സുരാജ് സ്വന്തം സോഷ്യൽ മീഡിയ പേജുകളിൽ ചിത്രം പങ്കുവെച്ചിട്ടില്ല.
